Gávdnon kulturmuittut

1978 mannosaš kulturmuitolágas daddjojuvvo ahte kulturmuittut ja kulturbirrasat daid mihtilmasvuođain ja variašuvnnaiguin galget suodjaluvvot min kulturárbbi ja identitehta oassin ja oassin ollislaš biras- ja resursahálddašeamis. 

Kulturmuitun oaivvilduvvojit buot mearkkat olbmo doaimma maŋis min fysalaš birrasis, maiddái lokalitehtat maidda čatnasit historjjálaš dáhpáhusat, osku dahje árbevierru. Sámi kulturmuittut jagi 1917 rájes dahje boarráseappot leat automáhtalaččat ráfáidahttojuvvon ja daid hálddaša Sámediggi. 

Sámi kulturmuittut leat mearkkat min máttuid maŋis eanadaga geavaheamis ja ássamis. Sámi kulturmuittut gaskkustit máhtu min eallineavttuid, birgenstrategiijaid, resursageavaheami, oskku ja heivehemiid birra eanadagas. Danne leat sámi kulturmuittut deaŧalaš duođaštanávdnasat sámi historjjá ja ovdahistorjjá birra. 

Váldde minguin oktavuođa jos leat gávdnan juoidá dahje oaidnán maid nu maid don jáhkát sáhtášii leat dološ sámi kulturmuitu. Du gávnnus ahte addit ođđa máhtu sámi historjjá ja ovdahistorjjá birra.