Kulturmuittut čájehit máŋggalágan beliid sámi kultuvrras, iešguđege áigodagain. Buot boarráseamos lea bivdorusttet báikkis Vensmoen. Elliid bivdin rokkiin lea vuohki mii lea geavahuvvon gitta geađgeáiggi rájes ja gitta 1700-lohkui. Goivo čiekŋalis rokkiid maid gokče rissiiguin. Boazoeallu vuojehuvvui guvlui, ja muhtun eallit gahčče rokkiide. Rusttegis leat eanet go 10 rokki, mii čájeha ahte ollu olbmot leat leamaš barggus.

Ståkkåhajåhkås sáhttit oaidnit boares stállosajiid mat leat maŋŋálagaid johkagáttis. Dán lágan kulturmuittut gávdnojit ollu Sáltoduoddaris. Dat leat ožžon nama dan mielde go leat stuorrát ja čielgasat, ja jurddašedje ahte dat gullet stállui. Sajit hástalit min smiehttat movt dát stobut oidnojedje olggos, ja mas sii geat elle doppe ožžo birjejumi. Dát leat várra árra boazodoallokultuvrra maŋis báhcán. 

Eará kulturmuittut maid sáhttá oaidnit, lea bálvvosbáiki Stødi, mii muitala sámiid dološ oskku historjjá birra. Bárkejuvvon beazit Luonovággis čájehit measta vajálduvvan ávkkástallanvuogi atnit beazi biebmun, sisbárku cuvkejuvvui ja ferdnejuvvui jáffun. Storjord báikkis oidnojit goađit ja áittid.