Dát lea bivnnugis vázzinbáiki turisttaide ja báikki olbmuide. Ollu jagiin lea fokuseret guovllu nuoskkideami. Dohko leat ráhkaduvvon maiddái máŋga dollasaji kulturmuitoguovllus, ja kulturmuittuid alde leat maid gorgŋoduvvon. 

Máinnas státtáid birra Činavuohpis muitala movt eanadat šattai. Báiki lea dat kulturmuitolokalitehta guovllus gos leat eanemusat futnan olbmot. Sámediggi ja Porsáŋggu gielda leat láhčán nu ahte báikegotti olbmot ja turisttat ain sáhttet ain iluin vádjolit dán čáppa guovllus, muhto seammaš seastit kultureanadaga. 

Eanadahkii čatnasit sámi muitalusat mat gaskkustuvvojit galbema bokte. Dohko leat ceggejuvvon hivssegat ja lea ráhkaduvvon bisánansadji. 

Dološ muitalusat

Sámediggepresideanta Aili Keskitalo dajai kulturbálgá rahpamis ahte dán lágan njálmmálaš muitalusat sáhttet leat hui boarrásat, ollu boarraseappot go maid čálalaš gáldut sáhttet muitalit. Dát muitalusat leat sámi kultuvrra deaŧalaš oasit. Máttut lea sohkabuolvvaid čađa gaskkustan kulturárbbi viidáseappot. Ođđa galbbat ja dieđut sáhttet dagahit ahte muitalusat ellet viidáseappot. 

Sáhkavuorustis dajai son ahte lea deaŧalaš muitit ahte Čiŋavuohppi lea maiddái cuvccas eanadat, ja ahte muitalanárbevierus leat morálalaš bealit. 

Maŋimuš oassi rahpandoaluin lei Mearrasiida. Ollugat ledje boahtán gullat sáhkavuoruid ja suohtastallat ovttas.  Hartvig Birkely muitalii maid kulturmuittut, báikenamat ja čálalaš gáldut sáhttet muitalit geavaheami ja ássama birra vuonas. Kjersti Schanche muitalii báktedáidaga birra Porsáŋggus.