Sámi dearvvašvuođadutkama etihkalaš lávdegoddi

Sámi kollektiiva miehtan galgá ordnejuvvon sámi dearvvašvuođadutkama oktavuođas. Sámediggeráđđi lea delegeren válddi Sámi dearvvašvuođadutkama etihkalaš lávdegoddái addit dakkár miehtama.

Sámi dearvvašvuođadutkan lea dutkansuorgi mii jođánit ovdána. Seammás eai vuhtiiváldde lágat eaige eará dutkanetihkalaš njuolggadusat sámiid kollektiiva iešmearridanvuoigatvuođa dákkár dutkama oktavuođas. Danne lea Sámediggi mearridan Etihkalaš njuolggadusaid sámi dearvvašvuođadutkama várás 2019:s (ášši 23/19) ja maŋŋá revideren njuolggadusaid 2025:s (ášši 32/25).

Loga sámi dearvvašvuođadutkama etihkalaš njuolggadusaid (PDF, 241 kB)

Njuolggadusat leat vuođđuduvvon raportii maid sámediggeráđi nammadan áššedovdi lávdegoddi lea ráhkadan 2016:s, ja mat čuvvot julggaštusa 2011 sámeparlamentarihkarkonferánssas. Loga raportta: Forslag til etiske retningslinjer for samisk helseforskning og forskning på samisk humant biologisk materiale

Loga gulaskuddancealkámušaid raportii

Njuolggadusaiguin háliida Sámediggi sihkkarastit ahte sámi dearvvašvuođadutkan vuođđuduvvá álgoálbmogiid iešmearridanvuoigatvuhtii, ja vuhtiiváldá ja árvvusatná sámi kultuvrra ja sámi servodaga girjáivuođa ja iešvuođa.

Sámi kollektiivvalaš miehtama viežžan

Ohcanbagadus (PDF, 293 kB)

Jus leat eahpesihkar dárbbaša go du prošeakta sámi kollektiivvalaš miehtama, de sáhtát sáddet sisa ovdanbuktinárvoštallanskovi (Fremleggingsvurdering). Dáid áššemeannudit lávdegotti čálli ja lávdegotti jođiheaddji dahje nubbinjođiheaddji dađistaga.

Ovdanbuktinárvoštallan - Sámi dearvvašvuođadutkamii

Jus leat gažaldagat ohcamuša dahje njuolgadusaid birra, de sáhttá jearrat lávdegotti čállis Bent Martin Eliassen Strandås: bent.m.strandas@samediggi.no, +47 78 47 40 50.

Lávdegotti lahtut ja persovnnalaš várrelahtut áigodagas 01.01.26-31.12.2029

  • Lahttu: Geir Ivar Nedredal, vuosttašamanueanssa, dr. med./váldodoavttir, UiT/UNN
    • Persovnnalaš várrelahttu: Jonill Margrethe Fjellheim Knapp, doavttir spesialisereme (LIS3), Finnmárkkubuohcciviessu
  • Lahttu: Berit J. Guttorm Ballari, stipendiáhtta, riektedieđa, UiT
    • Persovnnalaš várrelahttu: Maret Aile Sara, juridihkalaš čielggadeaddji, Finnmárkokomišuvdna
  • Lahttu: Tor Arne Johansen, buohccedivššár, SÁNAG geavaheaddjiráđi miellahttu
    • Persovnnalaš várrelahttu: Grethe Dunfjeld, pensionista, cand.polit. SÁNAG geavaheaddjiráđi miellahttu
  • Lahttu: Margrethe Bals Utsi, psykologaspesialista ph.d., SÁNG BUP, Sámi klinihkka
    • Persovnnalaš várrelahttu: Susanna Ragnhild A. Siri, dutki ph.d., Sámi dearvvašvuođadutkama guovddáš, UiT
  • Lahttu: Astrid M. A. Eriksen, dutki, ph.d., Sámi dearvvašvuođadutkama guovddáš, UiT
    • Persovnnalaš várrelahttu: Anette Irene L. Larsen, seniorráđđeaddi ph.d., NASAK
  • Lahttu: Lena Kroik, guovlludivššár ph.d., Region Västerbotten, Ruoŧa Sámediggi nammadan
    • Persovnnalaš várrelahttu: Christina Storm Mienna, universitehtalektor ph.d., Ubmi universitehta. Ruoŧa Sámediggi nammadan
  • Lahttu: Leena Niittyvuopio-Jämsä. Suoma Sámediggi nammadan
    • Persovnnalaš várrelahttu: Lyda Heikilä. seniorráđđeaddi. Suoma Sámediggi nammadan

Sámediggeráđđi nammada lávdegotti lahtuid gitta ovtta dievasčoahkkináigodahkii. Lávdegoddi sáhttá dárbbu mielde viežžat eanet gelbbolašvuođa, omd. genehtalaš gelbbolašvuođa.  Kollektiiva miehtan gáibida unnimusat 2/3 eanetlogu. Mearrádusaid lea vejolaš dahkat go eai leat unnit go 4 lahtu/várrelahtu mielde. Jođiheaddjis lea duppaljietna ja lávdegotti eanetlohku vállje su.

Čoahkkinbeaivvit ja ohcanáigemearit 2026

Čoahkkinbeaivvit: 

Ođđajagimánu 28. b.

Njukčamánu 11. b.

Cuoŋománu 22. b.

Geassemánu 3. b.

Borgemánu 19. b.

Čakčamánu 23. b.

Golggotmánu 28. b.

Juovlamánu 2. b.

Ohcanáigemearit:

Ođđajagimánu 14. b.

Guovvamánu 18. b.

Njukčamánu 27. b.

Miessemánu 13. b.

Geassemánu 24. b.

Čakčamánu 4. b.

Golggotmánu 9. b.

Skábmamánu 13. b.

Lávdegotti mandáhtta

Sápmelaččain lea kollektiivvalaš iešmearridanvuoigatvuohta siviila ja politihkalaš vuoigatvuođaid ON konvenšuvnna mielde, ja ekonomalaš, sosiála ja kultuvrralaš vuoigatvuođat (ESK) mielde, ja ON álbmotálbmotjulggaštusa mielde. Maiddái ILO-konvenšuvnna 169 mielde ja Sámedikki ja stáhta eiseválddiid konsultašuvdnabargovuogi mielde, mii lea mearriduvvon gonagaslaš resolušuvnnas 2005:s, lea sápmelaččain vuoigatvuohta searvat ovttaárvosaš bealálažžan dearvvašvuođadutkamušprošeavttaid buot dásiin. Lávdegoddi galgá:

  • Sámi álbmoga olis addit kollektiiva miehtama sámi dearvvašvuođaprošeavttaide Norggas.
  • Addit kollektiiva miehtama gustovaš sámi dearvvašvuođadutkama etihkalaš njuolggadusaid mielde.
  • Árvvoštallat dutkanprošeavttaid sierra čoahkkimis ja ovdal čoahkkimiid medisiinnalaš ja dearvvašvuođafágalaš dutkanetihka Regiovnnalaš lávdegottiin (REK).
  • Dárbbu mielde gulahallat ja leat olámuttus medisiinna ja dearvvašvuođafága Nationála dutkanetihkalaš lávdegotti várás (NEM), REK ja eará relevánta dutkanetihkalaš lávdegottiide.
  • Nu bures go vejolaš vástidit dutkanetihkalaš gažaldagaid dutkanjoavkkuin ja dutkiin, ja oassálastit relevánta forain.
  • Evalueret ja dárbbu mielde evttohit rievdadusaid sámi dearvvašvuođadutkama etihkalaš njuolggadusaide.

Komitéens bestemmelser om habilitet. (PDF, 144 kB) 

Maŋemusat rievdaduvvon 02.02.2026 09.50

Juogadanboalut