Voice of Norway nammasaš appas gulat eanet Sámedikki duogáža birra, earret eará manne lea ásahuvvon. Gulat maid Sámedikki doaimmaid birra sihke nationála ja riikkaidgaskasaš dásis, ja leat maiddái dieđut Sámedikki arkitektuvrra ja dáiddačoakkáldaga birra. Muitalat maid oasážiid sámi historjjás ja kultuvrras, ja guldaleaddjit besset maid guldalit Sámedikki čáppa luođi.

Jietnaláidesteapmi lea olamuttos buohkaide appa bokte man namma lea Voice of Norway. Olbmot geat galledit Kárášjoga sáhttet viežžat Sámedikki ruvttu (jietnabálgá) appas. Go leat Sámedikki olggobealde, de muitališgoahtá appa automáhtalaččat daid iešguđet jietnamuitalusaid dađis go váccaša Sámedikki birra. Fálaldat lea dál dárogillii ja eŋgelasgillii, muhto áigumuš lea viiddidit maŋŋil maiddái sámegielaide.

– Sávvat buohkaide bures boahtima oahpásmuvvat ja vásihit Sámedikki appa bokte. Dát fálaldat lea dehálaš maiddái olgoriikkalaččaide geat háliidit oahppat eanet sámi parlameantta birra, dadjá dievasčoahkkinjođiheaddji Tom Sottinen.

App-fálaldat lea nuvttá, ii leat eará go viežžat dan. Dán láidesteami sáhtát iežat leavttu ja jođu mielde geavahit, váccašit telefovnnain čuoggás čuoggái.

Svea Vikander lea eŋgelasgielat muitaleaddji. Lisa Marie Kristensen lea dárogielat muitaleaddji ja GLR, Nils Martin Kristensen bokte, lea bádden ja buvttadan jietnamuitalusaid.

Ná dagat:

Iežat telefovnnas vieččat appa Voice of Norway. Oza doppe Sámedikki ja viečča/laste vulos ruvttu. Go leat viežžan ruvttu, de sáhtát jáddadit mobiilaneahta ja čuovvut ruvttu čuoggáid mielde. Jos leat nuppesajis dahje eará báikkis, de sáhtát maid geavahit dán appa go ozat Sámedikki. Deaddilat čuoggáid maid háliidat gullat dan ruvttus.

Dihtetgo ahte Sámediggi lea maid ráhkadan digitála ofelastima sámediggevisttis? Dan gávnnat dáppe.