– Dehálaš ahte ovddasvástádus mieđihuvvo ja ahte vahágat buhtaduvvojit

– Dehálaš ahte ovddasvástádus mieđihuvvo ja ahte vahágat buhtaduvvojit

Sámediggepresideanta Aili Keskitalo lea duhtavaš dainna ahte bealit buhtadusáššis ovddeš Divtasvuona suohkana vuostá leat soahpan dáhtolaš čovdosa mii mielddisbuktá ahte ášši loahpahuvvo beliid gaskkas ja duopmostuolus.

Deaddil ja stuora govva ihtáAili Keskitalo Kenneth Hætta Guokte oappáža ovddeš Divtasvuona suohkanis áššáskuhtiiga suohkana go oaivvildeigga ahte leaba gillán mánnávuođas fuolahusváilli ja illasteami. Maŋŋel soahpama oažžuba dál ekonomalaš buhtadusa vahágiid ovddas maid leaba ožžon mánnávuođas.

– Go ovttaskas olbmot ja servodat galget ovttas mannat viidáseappot, de lea dehálaš ahte ovddasvástádus mieđihuvvo ja ahte vahágat buhtaduvvojit. Sámediggi áigu dan dihte bargat viidáseappot olahan dihte vuoiggalašvuođa ja buhtadusa sámi mánáide geat leat gillán veahkaválddálašvuođa ja illasteami, dadjá sámediggepresideanta Aili Keskitalo (NSR).

Divtasvuona suohkan, mii maŋŋil lea juhkkojuvvon ja oasi das lea váldon mielde ođđa Narvik suohkanii, áššehuvai diggegottis guovvamánus 2019, ja ášši guoddaluvvui de lágamánneriektái. 2019:s manai maid Sámediggi mielde oasehasveahkkin diggeáššis. Dát ášši lea dál loahpahuvvon soahpamiin ovdal go galggai lágamánneriektái. Oappáš guovttos oažžuba 2 250 000 ruvnno goabbáinai.

Muhto Narvik suohkan ii áiggo addit nissoniidda šállošeami.

– Lea váidalahtti ahte Narvik suohkan ii atte eavttuhis šállošeami oappáš guoktái daid vahágiid ovddas maid leaba šaddan gillát dan dihte go dalá Divtasvuona suohkan ii suddjen sudno veahkaválddálašvuođa ja illasteami vuostá bajásšattadettiin, dadjá Keskitalo.

Jearahallama addá presideanta Aili Keskitalo (NSR), +47 971 29 305, aili.keskitalo@samediggi.no