Demokratiija ja oassálastin dievasčoahkkináššin

Demokratiija ja oassálastin dievasčoahkkináššin

Sámediggeráđđái lea dehálaš prinsihppa ahte eanemus lági mielde olbmuin galgá leat jietna mii gullo sámi servodagas. Sámedikki dievasčoahkkimii boahtte vahku lea sámediggeráđđi danne válljen loktet ášši mii addá vejolašvuođa dievasčoahkkimii digaštallat hástalusaid joavkkuide mat dávjá eai leat mielde mearrideame man birra ságastallojuvvo sámi servodatdigaštallamis.

Deaddil ja stuora govva ihtáAili Keskitalo Kenneth Hætta Buresdoaibmi demokratiijas vállje álbmot ovddasteddjiid stivremii friija válggaid bokte, mas buohkat geain lea jienastanvuoigatvuohta besset jienastit dan olbmo gean/dan bellodaga man sii háliidat galgá/galget stivret. Álbmot sáhttá maid oassálastit dainna lágiin ahte vuolgit evttohassan iešguđet politihkalaš luohttámušdoaimmaide. Dábáleamos vuohki oassálastit demokratiijii ja váikkuhit dasa lea jienastanvuoigatvuođa geavaheami bokte. Jus uhccán olbmot geavahit jienastanvuoigatvuođa dahje jus dihto joavkkut eai geavat dan, de sis lea uhcit váikkuhanfápmu

– Sámi álbmot lea uhcci logu dáfus, ja mis leat iešguđetlágan eavttut ja rámmat váikkuhit dan politihkkii mii lea mielde ovddideame ja áimmahuššame sámi servodaga, dadjá sámediggepresideanta Aili Keskitalo (NSR).

Son oaivvilda deaŧalažžan ahte dat siviila sámi servodaga joavkkut ja lahtut maidda ii sihkkarasto mielváikkuheapmi sámi demokratiijii dábálaš válgga bokte Sámediggái, fertejit oažžut vejolašvuođa ovddidit iežaset beroštusaid eará mekanismmaid dahje arenaid bokte.

Ovdamearkkat dákkáraš joavkkuide dahje lahtuide leat uhcit sámegielat, mánát ja nuorat, doaibmavádjit sápmelaččat ja LHBTIQ-olbmot.

– Dát ii leat dievaslaš listu, muhto čájeha oasi hástalusas dakko bokte ahte sámi servodagas eai leat leamaš doarvái resurssat vuođđudit organisašuvnnaid mat sáhttet ovddastit uhcit joavkkuid siviila sámi servodagas, dadjá Keskitalo, ja deattuha ahte ovttasbargu ferte dáhpáhuvvat ovttasráđiid singuin geat háliidit dan ja ahte sii ovttas galggaše árvvoštallat mekanismmaid dahje arenaid mat sáhttet leat mielde dahkame ahte sin beroštumit buorebut vuhtiiváldojuvvojit siviila sámi servodagas.

Go váilevaččat ovddastuvvon joavkkuide láhčá eanet mielváikkuheami Sámedikki doaimma ja politihkkahábmema ektui, de dat movttiidahttá servodatáŋgiruššamii ja politihkalaš áŋgiruššamii, ja lea mielde ovddideamen ja áimmahuššamin iešguđet beroštusaid ja sihkkarastimin oainnusmahttima. Seammás dat addá Sámediggái eanet máhtu ja govddit mearridanvuođu sámi servodatovddideapmái, ja lea mielde loktemin demokratiija ja Sámedikki legitimitehta.

– Ávžžuhan olbmuid čuovvut dán dehálaš digaštallama go dievasčoahkkin meannuda ášši boahtte vahku, dadjá Keskitalo.

Dievasčoahkkinášši 26/21 Demokratiija ja oassálastin digaštallojuvvo gaskavahku geassemánu 16. beaivvi, maŋŋel go Sámedikki giellamovttiidahttinbálkkašupmi lea geigejuvvon dii. 15. Dievasčoahkkin sáddejuvvo njuolga Sámedikki neahtta-TV:s, https://sametinget.kommunetv.no/

Jearahallama addá Sámedikki presideanta Aili Keskitalo (NSR), aili.keskitalo@samediggi.no