Doarjja boazodoalu resursa- ja rávvenguovddáža ásaheapmái Guovdageainnus

Doarjja boazodoalu resursa- ja rávvenguovddáža ásaheapmái Guovdageainnus

Sámediggi lea juolludan 500 000,- ru Ovddos AS:i ásahit resursa- ja rávvenguovddáža boazodoalu váste Guovdageainnus.

Ovddos AS lea resursa- ja rávvenguovddáš boazodollui, maid Guovdageainnu suohkan eaiggáduššá. Ovddos juolluda doarjagiid sihke báikkálaš ealáhuseallima ovdánahttinprošeavttaide, ja maiddái iežas prošeavttaid ovdánahttimii.

Dál lea plána ásahit boazoealáhusa resursa- ja rávvenguovddáža Guovdageidnui. Ulbmilin lea veahkehit orohagaid hálddahuslaš ovddasvástádusbargguiguin ja bálvalusaiguin, nu go hábmet orohatplánaid ja ráhkadit doallonjuolggadusaid, mat leat mearrideaddji dokumeanttat areálahálddašeamis. 

 Sámediggeráđđi árvvoštallá ásaheami buorrin doaibmabidjun Guovdageainnu boazoealáhussii. Ohcamušas prošeakta soahpá Sámedikki 2020 bušeahta vuoruhusaiguin, gelbbolašvuođa- ja kapasitehta buorideapmi boazodoalus, dadjá sámediggepresideanta Aili Keskitalo (NSR).

Ulbmilin lea hukset bistevaš resursa- ja rávvenguovddáža boazodoalu iežas eavttuid mielde, mii galgá dahkat hálddahuslaš vuođu buorre areála- ja resursahálddašeapmái. Gelbbolašvuođa lonohallan orohagaid ja almmolaš hálddahusa gaskkas lea eaktun bargui, mii galgá addit buoremus eavttuid Guovdageainnu boazodoalu bistevaš čovdosiidda.

– Ovdabargu mii galgá dahkkot dán prošeavttas lea dehálaš, ja mii dávista muhtun hástalusaide maid mii diehtit, maŋimusat barggu oktavuođas cealkámušas boazodoallošiehtadussii. Sámediggeráđđi lea ilus go mii sáhttit doarjut ekonomalaččat ja illudit bargui mii galgá dahkkot, loahpaha sámediggepresideanta.  

Eambbo dieđuid dahje jearahallama ovddas, váldde oktavuođa sámediggepresideanttain, Aili Keskitaloin (NSR)  +47 971 29 305, e-poasta: aili.keskitalo@samediggi.no