Doarjja iešsorbmeneastadeapmái

Doarjja iešsorbmeneastadeapmái

Sámediggeráđđi juolluda 300 000 ruvnno doarjaga Finnmárkku buohccivissui /SÁNAG:i. Doarjja galgá geavahuvvot heivehit kurssa iešsorbmeneastadeami birra “Áicil iešsorbmenjurdagiidda” sámi kontekstii.

Iešsorbmenváttisvuohta lea duođalaš álbmotdearvvašvuođa- ja servodatváttisvuohta Sámis. SÁNAG:s (Sámi klinihkas) lea earenoamáš ovddasvástádus eastadit iešsorbmemiid sámi guovlluin norgga bealde, ja maid buvttadit kultursensitiivvalaš eastadandoaibmabijuid.

Prošeavtta ulbmil lea eastadit iešsorbmemiid sámi guovlluin, gelbbolašvuođa loktema bokte álbmogis, dasa ahte áicat ja jearrat iešsorbmenjurdagiid birra, kursemis álbmoga šaddat dihtomielalažžan iešsorbmenjurdagiidda, ja maid oažžut máhtu movt viidáset háhkat dárbbašlaš veahki.

– Sámediggi oaidná ahte prošeakta heivehit kurssa “Áicil iešsorbmenjurdagiidda lea dehálaš ja dárbbašlaš bargu, ja okta doaibmabidju mas sáhttá leat stuora mearkkašupmi sámi álbmogii, lohká sámediggeráđđi Runar Myrnes Balto (NSR).

Sámedikki mielas lea dehálaš eastadanbarggu doaimmahit dán suorggis, muhto váilot reaiddut maid sáhttá geavahit eastadanbarggus. Kurssa heiveheapmi “Áicil iešsorbmenjurdagiidda” lea maid okta evttohuvvon doaibmabijuin Norgga, Ruoŧa ja Suoma iešsorbmeneastadanplánas sápmelaččaid gaskkas.  

– Reaidu mii lea kultuvrralaččat ja gielalaččat heivehuvvon, addá buoret vásáhusa kursaoasseváldiide, ja gelbbolašvuohta mii doppe háhkkojuvvo addá stuorát vejolašvuođaid oažžut ávkki kurssas, lohká Myrnes Balto.

Dát prošeakta lea ovttasbargu gaskkal SÁNAG, Vivat, RVTS Davvi ja gaska, ja sii barget buohkat iešsorbmeneastademiin sámi guovlluin. Dát reaidu mii dál galgá heivehuvvot sámi diliide, sáhttá geavahuvvot visot sámi guovlluin. Máŋggas geain lea vásáhus dán kurssas, oaivvildit ahte dát kursa lea earenoamážit heivehuvvon jorgaleapmái ja kultuvrralaš heiveheapmái.

300 000 ruvdnosaš doarjja juolluduvvo doarjjaortnegis «Doarjja dearvvašvuođa-, fuolahus- ja mánáidsuodjalusprošeavttain», vuoruheamis “Prošeavttat mat sáhtášedje eastadit ja geahpedit iešsorbmemiid, iešsorbmengeahččalemiid ja iežas skáidnemiid meari”.

Jearahallamiid ja eará gažaldagaid dihte, váldde oktavuođa sámediggeráđiin Runar Myrnes Balto (NSR), +47 977 73 778, runar.myrnes.balto@samediggi.no

Ražat go don iešsorbmenjurdagiiguin dahje dovddat go ovttage geas leat iešsorbmenjurdagat? De sáhtát váldit oktavuođa:

Mentála dearvvašvuođa Veahkketelefovdna: tlf.: 116 123 (birra jándora) neahttačálašanbálvalus sidetmedord.no (birra jándora)
Kirkens SOS: 22 40 00 40 (birra jándora) dahje neahttačálašanbálvalus
www.soschat.no juohke beaivve dii. 18.30-22.30 (bearjadaga gitta 01.30).
SÁNAG Mánáide ja nuoraide 78 96 74 20