Doarju mátkeealáhusfitnodaga Gáŋgaviikkas

Doarju mátkeealáhusfitnodaga Gáŋgaviikkas

Sámediggeráđđi lea juolludan 158 000 ruvnno doarjjan Bente Austii, sávnnji huksemii.

Deaddil ja stuora govva ihtáBente Aust lea okta sis gii lea mannan vuosterávdnjái ja fárren ruovttoluotta iežas ruovttugillái Goalsevuohppái Gáŋgaviikka gielddas. Doppe son jođiha Langfjordnes Gjestegård, mii fállá idjadeami ja lagasguovllu biepmu gussiide. Goalsevuohpis leat čieža ássi, iige dohko mana geaidnu. Vaikko lea doaresbealde, de vásiha gávpedoaibma buori lassáneami, ja guossit bohtet vácci, čuoigga, skohteriin dahje johtilisfatnasiin, mii fitná gilis guovtte geardde beaivái.

Aust háliida dál viiddidit iežas fálaldaga ja lea ohcan ja ožžon doarjaga hukset sávnnji vai beassá fállat iežas gussiide vuogas orruma.

Sámediggeráđđi Silje Karine Muotka (NSR) oaivvilda dán gelddolaš ásaheapmin áiggis go olu smávva báikegottit sámi guovlluin vásihit eretfárrema ja dárbbašivčče eanet ealáhus- ja fitnodatovdáneami.

– Danne lea dehálaš ahte muhtin fitnodatásaheaddjit duođai háliidit vuoruhit ealáhusdoaimma huksema, oaivvilda Muotka..

Son oaivvilda ahte dákkár ásaheapmi sáhttá buktit ođđa movtta ja bohciidahttit vejolašvuođaid dakkár guovllus gos eai soaitte earát geat áŋgiruššet.

– Šaddá gelddolaš čuovvut dán fitnodatásaheami viidáseappot ja doaivumis Goalsevuohpi historjá ja kultuvra ovdanbuktojuvvo bures gussiide geat fitnet doppe ovddasguvlui.

158 000 ruvdnosaš doarjja juolluduvvo doarjjaortnegis Doarjja máŋggabealálaš ealáhusaide. Sámedikki mihttu lea nannet ealáhusaid main lea stuorrunpotensiála ja vuoruha doarjaga doaimmaide mat addet fitnodatovdáneami sámi guovlluin.

Jus leat gažaldagat, dahje háliidat jearahallama, váldde oktavuođa sámediggeráđiin Silje Karine Muotka (NSR), mob. +47 984 87 576, silje.karine.muotka@samediggi.no