Gean árvalat oažžut Sámedikki giellamovttiidahttinbálkkašumi 2021?

Gean árvalat oažžut Sámedikki giellamovttiidahttinbálkkašumi 2021?

Deaddil ja stuora govva ihtáGii ánssáša oažžut Sámedikki giellamovttiidahttinbálkkašumi? Bálkkašumi sáhttá oažžut ovttaskas olmmoš dahje dakkár ásahus, prošeakta dahje organisašuvdna, mii/gii lea bidjan ollu návccaid nannet, ovddidit ja seailluhit sámegiela. 

Sámediggi juohká bálkkašumi juohke njealját jagi. Bálkkašupmi lea 50.000 ruvnnu ja dáiddadiploma. 

Juohkehaš sáhttá evttohit, gii berrešii vuoitit giellamovttiidahttinbálkkašumi. Ákkastala oanehaččat árvalusat čálalaččat ja sádde dan Sámedikki giellaossodahkii ovdal cuoŋománu 30. beaivvi

Sámediggeráđđi mearrida, gii oažžu bálkkašumi. Giellamovttiidahttinbálkkašupmi geigejuvvo Sámedikki geassemánu dievasčoahkkima oktavuođas.

Árvalusat sáhttá sáddet deike: samediggi@samediggi.no 

Sámediggeráđi lahtut ja Sámedikki bargit eai sáhte oažžut bálkkašumi. 

Giellamovttiidahttinbálkkašumi leat ovdal vuoitán Divtasvuona váhnenjoavku 2000:s, Skániid giellajoavku 2001:s, Harry Solhaug Gáivuonas 2002:s, Sagka Stångberg Deartnás 2009:s, Iŋgor Ántte Ánte Mihkkal/Ánte Mikkel Gaup 2013:s ja Jane Astrid Juuso Unjárggas 2017:s.