Reagere árvalussii bissehit mearraluossabivddu

Reagere árvalussii bissehit mearraluossabivddu

Sámediggeráđđi Silje Karine Muotka (NSR) oaivvilda Birasdirektoráhta árvalus ii leat doarvái bures jurddašuvvon. – Dát boktá vuostehágu, dadjá Muotka.

Birasdirektoráhtta lea sádden gulaskuddamii árvalusa gieldit mearraluossabivddu gittaneavvuiguin Bearalvágis, Deanus ja Gáŋgaviikkas, ja maiddái olgolis Davvesiidda suohkanis ja Davvenjárgga suohkanis jagi 2021 áigge.

– Birasdirektoráhta árvalus mearkkaša čielgasit dan, ahte olbmot eai sáhte bivdit luosaid mearas nu mo álo leat dahkan, ja dat váikkuha garrasit dáid guovlluid sámi kultuvrii ja eallinvuohkái, dadjá sámediggeráđđi Silje Karine Muotka (NSR).

Birasdirektoráhtta árvalusa ággan lea Deanu čázadaga luossanáli negatiivvalaš ovdáneapmi.

– Sámediggi ii leat ovttaoaivilis árvalusain ja vugiin mo dat lea hábmejuvvon. Sámi beroštumit eai leat doarvái árrat fátmmastuvvon árvalusa hábmenprosessii, mii min mielas dušše vuhtiiváldá biraslaš beliid, dadjá sámediggeráđđi.

Sámediggi oaivvilda ahte Birasdirektoráhta árvalus ii leat vuhtiiváldán dan maid árbediehttit leat máŋgii ovddidan, namalassii ahte ferte leat balánsa go bivdá iešguđetge náliid.

– Ferte maiddái bivdit daid elliid ja guliid, mat borret sihke meađđemiid, veajehiid ja luosaid. Dát leat sihke lottit, eará eallit ja eará guollešlájat. Vejolašvuohta doaimmahit dán árbevirolaš hálddašeami lea dađistaga gáržžiduvvon, ovtta gildosis nubbái, dadjá Muotka.

Sámediggi lea kritihkalaš dasa ahte eiseválddit ovddidit árvalusa oalát bissehit mearraluossabivddu seammás go leat šiehtadallamin Suomain johkabivddu birra.

– Sámediggi atná dehálažžan ahte áššit leat vuoiggalaččat ja ahte noađđi juhkkojuvvo, ja mii ballat mearraluossabivdu vuohon vuoittáhallat, dadjá Muotka.

Gulaskuddanáigemearri lea miessemánu 5. beaivvi, ja Sámediggi áigu sáddet gulaskuddancealkámuša áššis.

Jearahallama addá sámediggeráđđi Silje Karine Muotka (NSR) tel. +47 984 87 576 dahje e-poasta: silje.karine.muotka@samediggi.no