Romssa gievkkanhoavddat galget oahppat eambbo bohccobierggu birra

Romssa gievkkanhoavddat galget oahppat eambbo bohccobierggu birra

Dál ožžot restoráŋŋat Romssas vejolašvuođa guossohit sámi herskkuid, nugo bohcco njuokčama ja váimmu. Sámedikki dahkan iskkadeamit čájehit ahte restoráŋŋat háliidit oahppat eambbo bohccobierggu birra vuođđoávnnasin. – Bohccobiergu lea okta dain dearvvašlaččamus biergguin mii gávdno, ja mu mielas okta dain buorebus biergguin, dadjá sámediggeráđđi Silje Karine Muotka (NSR).

Prošeakta, man namma lea Máistu, lea deaivvadanbáiki bohccobiergobuvttadeddjiid ja gievkkanhoavddaid várás. Treanda čájeha ahte geavaheaddjit leat hui diehtoáŋgirat, ja ahte beroštupmi borramuššii lassána. Jus restoráŋŋa galgá leat erenoamáš eará restoráŋŋaid ektui, de ferte borramuš mii guossohuvvo leat eambbo go dušše borramuš. Das ferte leat duogáš historjá mii dahká ahte restoráŋŋaguossit dovdet ahte vásihit juoidá erenoamáža.

– Heive hui bures dan čatnat bohccobiergobuvttadeddjiide. Leat olu buorit ja áidnalunddot historjját mat čatnasit sámi kultuvrii, ja dat addá bohccobiergobuvttadeddjiide vejolašvuođa vuovdit iežaset buktagiid ja dan bokte loktet bohccobierggu lasseárvvu, dadjá sámediggeráđđi Hans Ole Eira (Gb).

Bohccobierggu historjá lea guovddáš oassi Máisttus. Gos bohccot leat guhton ja gosa dat leat johtán, gos biergu boahtá, ja maiddái historjját ja norpmat mat leat čadnon buktagiidda.

– Restoráŋŋasuorggis lea dehálaš rolla márkanfievrridit ja gaskkustit máhtu Davvi-Norgga ja sámi kultuvrra birra. Sii geat guossohit borramuša sáhttet gaskkustit historjjá ja máhtu vuođđoávdnasa birra, ja dat sáhttá veahkkin loktet Sámi ja Davvi-Norgga borramušguovlun, dadjá Eira.

Gávpoga gievkkanhoavddat leat bovdejuvvon

Čakčamánu 20. b. lágiduvvo Máistu Romssas Skarvena biebmoteáhteris, gos sámi koahkka ráhkada árbevirolaš borramušaid ja gos dovddus davvinorgalaš koahkka ráhkada ođđaáigásaš borramušaid seamma vuođđoávdnasiin. Njuovčča, váibmu ja suovasbiergu leat oasit mat leat guovddážis.  

– Mii sápmelaččat leat dáinna borramušain bajásšaddan, eatge bohccobiergobiffain ja bohccobiergoburgeriin mat dávjá guossohuvvojit restoráŋŋain. Danin mii leat bovden davvinorgalaš ja Romssa gievkkanhoavddaid eambbo oahppat bohcco birra vuođđoávnnasin, dadjá Muotka movttegit.

Sámediggeráđit Silje Karine Muotka ja Hans Ole Eira rahpaba Máisttu, ja goappašagat dadjaba dan leat dehálaš deaivvadanbáikin.

– Sámediggi lea dál dáinna bargan muhtin áiggi, ja lea dehálaš ahte sámi biebmoárbevierut ja historjját šaddet eambbo dovddusin, dadjaba soai.

Jus ležžet gažaldagat dahje jus áiggut jearahallat, váldde oktavuođa sámediggeráđiin Silje Karine Muotkain (NSR), mob. +47 984 87 576, silje.karine.muotka@samediggi.no