Sámediggi bovde ohppiid joatkkaskuvllas vuosttaš sámi karriearakonferánsii

Sámediggi bovde ohppiid joatkkaskuvllas vuosttaš sámi karriearakonferánsii

Sámediggi bovde ohppiid 1.-3.cehkiin joatkkaskuvllas geain lea sámegiella fágan, min vuosttaš sámi karriearakonferánsii; Mii dárbbašit du! Mij dárbahip duv! Mijjieh datnem daarpesjibie!

Deaddil ja stuora govva ihtá

Don gii leat sámegielat oahppi, ja gii fargga loaiddastuvat iežat karriearaválggaide, leat dehálaš sámi servodahkii. Dii lehpet boahtteáiggi fágabargit. Sámi servodagas lea dárbu sámegielat fágagelbbolašvuhtii buot servodatsurggiin.

Dus gii leat sámegielat oahppi, lea earenoamáš gelbbolašvuohta, ja vaikko makkár karriearaválgga don dagat, de lea stuora dárbu dutnje. Mii dárbbašit sámegielat dearvvašvuođabargiid, oahpaheddjiid, mánáidgárdepedagogaid, politiijaid, juristtaid, bargiid sihke priváhta ja almmolaš hálddašemiin jna. Boahtteáigi dárbbaša ahte eanemus lági mielde dis válljejit alit oahpu ja geavahehpet iežadet sámegielgelbbolašvuođa viidáseappot iežadet fidnokarriearas.

Sámediggepresideanta Aili Keskitalo searvá konferánsii ja son sávvá ahte nu oallugat go vejolaš servet dán vuosttaš sámi karriearakonferánsii. Deaddil ja stuora govva ihtáSametingspresident Aili Keskitalo (NSR) 

– Mun sávan ahte sáhtán leat mielde gaskkusteame man dehálaččat ja earenoamážat sámegielat oahppit leat sámi servodahkii, ja ahte konferánsa addá ohppiide ávkkálaš dieđuid karriearaválljema ja fidnovejolašvuođaid birra mat gávdnojit, lohká sámediggepresideanta Aili Keskitalo.

Sámediggi lea čohkken oahppoinstitušuvnnaid ja earáid miehtá riikka ovdanbuktit iežaset searvama bokte konferánsii. Sii áigot doallat digitála standaid maid oahppit sáhttet oahppaladdat.

Konferánssas šaddet sihke oktasašbájit main iešguđet institušuvnnat dollet sáhkavuoruid, ja stándaoahppaladdamat maid don ieš stivret. standain šaddet maid iešguđetlágan webinárat, main dus lea vejolašvuohta divvut gažaldagaid njuolga sutnje gean oahppalattat.

Mii dárbbašit du!

Gos: Digitálalaččat

Goas: 25.03 2021 dii. 09.00-15.00

Gean várás: 1.-3 cehkiid ohppiide joatkkaskuvllas, geain lea sámegiella vuosttaš- dahje nuppigiella.

Dieđiheapmi: Váldde oktavuođa iežat joatkkaskuvllain, ja dieđit ahte dus lea beroštupmi. Du skuvla dieđiha dasto du searvat, ja don oaččut sisabeassandieđuid.

Don gii it gula makkárge joatkkaskuvlli muhto aŋkke háliidat searvat, sáhtát addit dieđu dákko; mari@tautdanning.no

Eanet dieđut; siv.marit.romsdal.eira@samediggi.no

Geahča talkshowa "Maid dál" mii lea inpirašuvdnafilbma mas 19 jahkásaš Mathis Eira hupmá gussiiguin sin oahpuid ja fidnoválljema birra: