Sámedikki doarjjaortnegis boazodollui leat ođđa vuoruheamit

Sámedikki doarjjaortnegis boazodollui leat ođđa vuoruheamit

Dál sáhttá ohcat doarjaga Sámedikkis earret eará investeremiidda, prošeavttaide mat nannejit árbevirolaš máhtu bearašboazodoalus ja doaibmabijuide mat veahkehit duođaštit bohccuid mat leat goddon boraspiriide.

Deaddil ja stuora govva ihtáSámediggeráđđi Silje Karine Muotka (NSR)Sámediggi lea dán jahkái rievdadan vuoruhemiid ja njuolggadusaid doarjjaortnegii mii guoská boazodollui. Dál sáhttá earret eará oažžut doarjaga investeremiidda mat ábuhit boazodoalu ođđahutkamii ja ovdáneapmái. Dát investeremat sáhttet leat ovdamearkka dihte skohterbarttat dahje ávdnasat maid dárbbaša ealáhusas, nugo reagat ja eará rusttegat mat eai leat mohtorfievrrut. Dán doarjaga sáhttet buohkat geain lea váldodienas boazodoalus ohcat.

– Sámediggái lea dehálaš vuoruhit sámi vuođđoealáhusaid ja olbmuid geat barget doppe. Boazodoalus leat ovdánahttinvejolašvuođat, ja diehtit ahte doppe leat olu nuorra hutkás olbmot. Mii háliidit doarjut boazobargiid geat leat innovatiiva ja áigot ovdánahttit iežaset ealáhusa, dadjá sámediggeráđđi Silje Karine Muotka (NSR).

Sáhttá maid ohcat doarjaga doaibmabijuide ja prošeavttaide mat veahkehit duođaštit bohccuid mat leat goddon boraspiriide, dahje doaibmabijuide mat veahkehit loktet beroštumi, áŋgiruššama ja beavttálmahttima boraspiriid liseansa- ja earrebivdui.

Boazodoalus lea árbevirolaš máhttu nanus. Dán, ovttas bearašboazodoaluin, háliida Sámediggi nannet.

– Boazodoalu gelbbolašvuođa vuođđun lea árbevirolaš máhttu. Dát lea min sápmelaččaid árbi, ja lea dehálaš dán seailluhit. Sámedikkis sáhttá ohcat doarjaga doaibmabijuide maid ulbmilin lea oahppat dahje oahpahit árbevirolaš máhtu, dadjá Muotka.

Prošeavttaide ja doaibmabijuide mat nannejit árbevirolaš máhtu bearašboazodoalus sáhttá maid ohcat doarjaga.

– Mun sávan ahte boazodoalus oidnet ahte mii vuoruhit maiddái sin geat barget boazodoalus, leaš dál beaivválaš barggus dahje bearašláhttun, danne go sii dahket dehálaš barggu sámi servodagas, dadjá Muotka.

Boazodoalu doarjjaortnegis lea rabas ohcanáigemearri.

Sámediggeráđđi Silje Karine Muotka (NSR) addá jearahallama ja vástida gažaldagaide, mob. +47 984 87 576, silje.karine.muotka@samediggi.no

Oza boazodoalu doarjaga