– Sámegiella ja kulturipmárdus lea dehálaš heahtediliin

– Sámegiella ja kulturipmárdus lea dehálaš heahtediliin

Sámediggeráđđi doarju sámi mánáidsuodjalusa fágafierpmádaga ja sámi heahtebálvalusaid ásaheami. Sámediggeráđđi Hans Ole Eira (Gb) lea ilus go beassá doarjut dehálaš bálvalusaid, mat leat sámi servodaga rašes joavkkuid váste.

Deaddil ja stuora govva ihtáHans Ole Eira Kenneth Hætta Sámi suohkaniid mánáidsuodjalusbálvalusat leat dieđihan ahte leat hástalusat fuolahit sámi mánáid vuoigatvuođaid buot dásiin, earret eará rekruteret sámi biebmoruovttuid, sihkkarastit doarvái dieđuid ja skoviid sámegillii, ja sihkkarastit doarvái giella- ja kulturgelbbolašvuođa bargiin. Sámediggeráđđi lea juolludan 450.000,- ruvnno Guovdageainnu suohkanii ásahit “Sámi mánáidsuodjalus” fágafierpmádaga, mii galgá váikkuhit buoret sámi kulturgelbbolašvuhtii ja man mihttomearri lea oažžut nu ovttalaš práksisa go vejolaš. Fierpmádagas leat sámi hálddašansuohkaniid mánáidsuodjalusbálvalusat mielde, mat galget veahkkin sihkkarastit ahte sámi mánáid vuoigatvuođat fuolahuvvojit, beroškeahttá gos riikkas mánná lea.

– Sámi mánáin lea riekti bajásšaddat sámegielain ja sámi kultuvrrain, ja dat vuoigatvuohta guoská maiddái mánáide geat leat mánáidsuodjalusa hálddus. Lea dehálaš ahte sámi bearrašat mat leat rašes dilis, vásihit ahte veahkkebálvalus vuhtiiváldá sin kultuvrra. Danin lean ilus dáinna áŋgiruššamiin, mii hukse nanu sámi fágabirrasa ja mii sáhttá veahkehit sámi bearrašiid vaikko gos riikkas orrot, dadjá sámediggeráđđi Hans Ole Eira (Gb).

Ásahit davvisámegiel chat-doaimma

Sámediggeráđđi lea maiddái juolludan 185.000,- ruvnno Kirkens SOS Nord-Hålogalandii álggahit sámi bálvalusaid sin heahtebálvalusas, mii lea dehálaš fálaldat olbmuide geat leat váttis diliin. Sámediggeráđđi juolludii jagis 2019 ruđaid Kirkenes SOS ovdaprošektii, mas oinnii ahte geavaheddjiin lea stuora dárbu sámi heahtedieđihanbálvalussii. Máŋggas leat čilgen dehálašvuođa das ahte olmmoš geainna gulahallá heahtedilis, ipmirda ja dovdá dan máilmmi mas son, gii dárbbaša veahki, eallá. Dál vuos ásahit davvisámegiel chat-doaimma, mas bargiin lea sámi giella- ja kulturipmárdus. Kirkens SOS almmuha bálvalusa čákčageasi.

– Heahtedilis lea oadjebas diehtit ahte olmmoš geainna gulahallá ipmirda du eallima, it ge dárbbat čilget olles konteavstta sutnje. Máŋgasiidda lea maiddái álkit muitalit váttis fáttáid birra iežas gillii. Sámi chat-bálvalus heivehuvvo gielalaččat ja kultuvrralaččat, seammás go beassá leat anonyma. Lean movttet go Sámediggi sáhttá veahkehit dakkár dehálaš áŋgiruššamis, dadjá sámediggeráđđi Hans Ole Eira (Gb).

 Jus háliidat jearahallat, váldde oktavuođa Hans Ole Eirain: e-poasta: hans.ole.eira@samediggi.no dahje telefovdna: +47 918 61 471