– Sámi ealáhuseallima dárbbašlaččat lokten

– Sámi ealáhuseallima dárbbašlaččat lokten

Reviderejuvvon stáhtabušeahta bokte addojuvvo sámi fitnodagaide deaŧalaš veahkki. Sámediggepresideanta Aili Keskitalo (NSR) dadjá buorre go ráđđehus doarju muhtun ráje Sámedikki fuolastuvvamiid.

– Sámi servodat lea nie movt muđui stuorraservodat roassodilis ja lea buorre go ráđđehus lea váldán muhtun min fuolastumiid duođas. Njeallje miljon ruvnnu roassodoaibmabijuide ealáhuseallimii Sámis lea dárbbašlaš min rašis fitnodagaide, dadjá sámediggepresideanta Aili Keskitalo (NSR).

Ráđđehus ovddidii odne miessemánu 12. b. reviderejuvvon stáhtabušeahtas jahkái 2020 mas ráđđehus evttoha čuovvovačča:

  • 4 miljon ru sámi ealáhuseallimii masa koronaroassu lea čuohcan.
  • 2,25 miljon ru galgá mannat liigegoluid gokčamii dan oktavuođas go Dielddanuori suohkan Romssas ja Finnmárkkus laktojuvvo sámegiela hálddašanguvlui suoidnemánu 1. b. 2020 rájes.
  • 6 miljon ru addojuvvo viidáset bargui oktii lokaliseret Sámi joatkka- ja boazodoalloskuvlla, ja sámi teáhtera Beaivváža Guovdageainnus.

Sámediggi oaidná maiddái buorrin go ráđđehus reviderejuvvon bušeahtas addá 10 miljon ru liigeveahki doaibmabijuide boazodoalus, mas lea leamaš eahpedábálaš hástaleaddji dálvi go ollu lea leamaš muohta, ealáhat lohkkašuvvan ja leamaš dárbu biebmat bohccuid dálvit.

Reviderejuvvon bušeahttaevttohus gárvvis dán vahkus

Sámediggeráđđi válddii oktavuođa Gielda- ja ođasmahttindepartementii njukčamánus dán jagi ja bivddii oažžut 10,8 miljon ru doarjjan reviderejuvvon nationála bušeahtas.

– Sámediggeráđđi áigu maŋŋelis dán vahkus ovddidit iežas reviderejuvvon bušeahttaevttohusa, mas ráđđehusa lasáhus lea maiddái mielde. Mii leat juo álggahan ollu doaibmabijuid mat leat oaivvilduvvon doarjjan sámi ealáhus- ja kultureallimii dán váttis áiggis, ja mis lea ain fokusis dat áiggis ovddas guvlui, dadjá sámediggepresideanta Aili Keskitalo.

Jearahallama addá sámediggepresideanta Aili Keskitalo, tel: 971 29 305