– Sandland brygge AS:s lassánit doaimmat vaikke lea pandemiija

– Sandland brygge AS:s lassánit doaimmat vaikke lea pandemiija

Oasusfitnodaga Sandland brygge AS eaiggádat, Stina Halvorsen ja Steinar Helge Halvorsen.
Sámediggi juolludii 291 000 kruvnnu doarjaga guossekáija huksemii. Pandemiija lea váikkuhan positiivvalaččat fitnodahkii, dál áŋgiruššá eanet norgalaš turisttaide, lohka sámediggepresideanta Silje Karine Muotka (NSR).

Silje Karine MuotkaSandland Brygge, Láhppi suohkanis, Romssa ja Finnmárkku fylkkas lea guolástanturistafitnodat mii fállá vásáhusaid ja idjasaji. Mearaborramuš mii ii leat fievrriduvvon ja lagasvuohta lundui galgá geasuhit eanet norgalaččaid boahtit Sandlandii. 

– Gitta jagi 2021:i ledje sii áŋgiruššan 100 % olgoriika gussiide, muhto go korona-dávda njoammugođii, de sii leat eanet geahčastan norgalaš gussiide, dadjá Muotka.

Sandland Brygge háliida birrajagi leahkit mátkemearri doaimmaiguin mat leat heivehuvvon áigodagaide. Sii áigot hukset govdunkáija gussiide geat ieža bohtet fatnasiiguin ja áigot finadit ráhkadusas.

– Mu mielaš lea jierpmálaš áŋgiruššat eambbo norgalaš turisttaide iige dušše olgoriikalaš turisttaide, lohka Muotka. 

Sandland Brygge galgá maid fállat čázi, el-rávnnji, hivssega, riššu ja bassan- ja goikadanvejolašvuođaid ja dasa lassin vel boaldámuša. Stina Halvorsen, Steinar Helge Halvorsen ja E. flåten eiendom AS eaiggáduššet oasusfitnodaga.

– Mii leat movttegat ja giitevaččat Sámedikki doarjaga ovddas min ođđa guossekáija-ráhkadussii, lohka doaibmajođiheaddji Steinar Halvorsen. Doarjja mearkkaša olu vai mii galgat nákcet duohtan dahkat prošeavtta, loahpaha Halvorsen.

Jearahallama addá ja gažaldagaide vástida sámediggepresideanta Silje Karine Muotka, tlf. +47 984 87 576, silje.karine.muotka@samediggi.no