Saetniesvoete- jïh liktemekommisjovnen reektehtsistie jïh gïetedallemistie dovne Saemiedigkesne jïh Stoerredignesne, nov tjïelke sjïdteme lea joekoen daerpies davvodh daaroedehtemen politihken mænngan. Daaroedehteme lea voenges seabradahkide irhkeme, jïh skaarah tjuerieh dovvesovvedh. Jïjnjh barkoeh aajmene, mohte gellie aaj tjïelke barkeme saemien kultuvrem jealajehtedh jïh nænnoestidh. Gellie almetjh saemien gïelem jïh kultuvrem dasseme, jïh kaanne bïhkedimmiem jïh viehkiem daarpesjieh dej saemien identiteetem gaavnedh, bååstede vaeltedh jallh nænnoestidh. Gellie almetjh eah arenah utnieh saemien ektiedomtesasse. Gaajhkh saemieh edtjieh saemien maanajgïertenuepieh, saemien ööhpehtimmieh maadth- jïh jåarhkeskuvlesne, jïh nænnoestamme tjåanghkoesijjieh utnedh saemien gïele- jïh kultuvrenuepiejgujmie. Saemiedigkie regijonaale govlehtimmie-prosesside böörie. Ulmie lea daarpoem gaavnedh saemien nuepide, öörnegidie jïh råajvarimmide fïerhtene veeljemegievlesne. Govlehtimmie edtja våaromem årrodh juktie vierhtiedidh mejtie jïh magkeres vuekine dah ovmessie saemien veeljemegievlieh nænnebe jallh jeatjahlaakan barkoe daarpesjieh juktie saemien gïelem jïh kultuvrem jealajehtedh, vaarjelidh jallh nænnoestidh. Tjaktjen 2025 Saemiedigkie govlehtimmieh Åarjel-Saepmie veeljemegievlesne hööltie. Daate lea dïhte mubpien veeljemegievlie gusnie govlehtimmie öörnesåvva. Golme jaepiej bijjeli govlehtimmieh edtjieh gaajhkine Saemiedigkien veeljemegievline öörnesuvvieh.
Lohkh govlehtimmieprieviem daesnie (PDF, 391 kB)
Mejnie Saemiedigkie sijhtieh vaestiedassh?
Saemiedigkie sæjhta daejredh magkerh daarpoeh saemien lïhkesasse-seabradahkh jïh almetjh utnieh guktie daaroedehtemen skaarah davvodh. Lea aaj vihkeles dååjrehtidh mah voenges saemien aktöörh jïjtje maehtieh darjodh, guktie tjïelth, daaroen institusjovnh jïh organisasjovnh maehtieh viehkiehtidh, jïh magkerh råajvarimmieh Saemiedigkie tjuara sjïehteladtedh. Lissine mijjieh sïjhtebe govledh mejtie daerpies Saemiedigkien dåarjoeöörnegh jeatjahtehtedh jallh nænnoestidh.
Åålmehtjåanghkoeh
Seamma mieresne tjaaleldh govlehtimmine leah aaj njieljie åålmehtjåanghkoeh veeljemegievlesne.
- Plaassja: Rahkan 11. biejjien 2025 ts. 18.00-20.00, Storstuggu, Ol-klemmetsaveien 50
- Tråante: Rahkan 12. biejjien 2025 ts. 17.30-19.30, Magistratsalen, Litteraturhuset i Trondheim, Kongens gate 2
- Nåavmesjenjaelmie: Rahkan 26. biejjien 2025 ts. 18.00-20.00, Scandic Rock City, Sverres gate 35
- Måefie Rahkan 27. biejjien 2025 ts. 18.00-20.00, Teaterkafeen på Nordland teater, Rådhusalleen 6
Mijjieh vielie bïevnesh sijjien jïh jeatjaj bïjre Saemiedigkien nehtesæjrose: Biejjielåhkoe - Saemiedigkie jïh sosijaale meedijese bïejebe gosse gaervies. Tïjjh kaanne ånnetji jeatjahlaakan sjidtieh – lohkh urremes bievnesh mijjen kaanaline
Åålmehtjåanghkoe lea gaahpode gaajhkesidie. Mijjieh åarjelsaemiengïelen jïh daaroengïelen gaskese appen tjïrrh toelhkestibie, man nomme Interactio. Vaeltieh meatan jïjtse bealjesem jis sïjhth toelhkem goltelidh.
Guktie govlehtimmine dåeriedidh?
Gaajhkesh gïeh sijhtieh, maehtieh tjaaleldh govlehtimmievaestiedassem seedtedh goeren tjïrrh mij lea daan nuelesne. Govlehtimmiemierie rahkan 28. biejjien 2025.
Dåeredh govlehtimmesne – dievtieh goerem daesnie
Jis ih maehtieh digitaale goerem utnedh, maahtah aaj dov vaestiedassem påastine seedtedh.
Sámediggi –Sametinget
Postboks 3
9735 Kárášjohka/Karasjok
Govlehtimmievaestiedassh leah byjjes byjjeslaaken mietie jïh Saemiedigkien gaskeviermiesæjrose bæjhkoehtieh.