Duohtavuođa- ja soabahankommišuvnna raporttas ja raportta meannudeamis sihke Sámedikkis ja Stuoradikkis, lea čielgan ahte lea stuora dárbu doaibmabijuide mat njulgeše dáruiduhttima vahágiid. Dáruiduhttin lea báikkálaš servodagaide guođđán bákčasiid ja háviid mat fertejit dikšojuvvot. Vaikko leat olu návccat biddjon ealáskahttit ja nannet sámi kultuvrra, de lea ain olu bargu báhcán. Oallugiin lea sámegiella ja sámi kultuvra rivvejuvvon, ja sii soitet dárbbašit láidesteami ja doarjaga iežaset proseassas gávdnat, váldit ruovttoluotta dahje nannet iežaset sámi identitehta. Oallugiin eai leat arenat gos gávnnaše sámi oktasašvuođa.
Buot sámiin galgá leat vejolaš oažžut sámi mánáidgárdefálaldagaid, sámegieloahpahusa sihke vuođđo- ja joatkkaskuvllas, ja jeavddalaš vejolašvuohta gávnnadit earáiguin gos beassá sámástit ja sámi kulturfálaldagaid muosáhit.
Sámediggi bovde guvllolaš gulaskuddanproseassaide maid ulbmil gullat makkár sámi fálaldagaid, ortnegiid ja doaibmabijuid guđege válgabiirres dárbbašit. Gulaskuddama vuođul árvvoštallat mii dasto man muddui ja movt iešguđege válgabiirriin dárbbašuvvojit nannejuvvon dahje rievdaduvvon áŋgiruššama ovddasguvlui dan ektui ahte ealáskahttit, bisuhit dahje ovddidit sámi gielaid ja sámi kultuvrra.
2026 giđa doallá Sámediggi gulaskuddama Nuortaguovllu válgabiirres. Dát lea goalmmát válgabiire gos dakkár gulaskuddan čađahuvvo. Golmma jagi siste galget dollojuvvot gulaskuddamat buot Sámedikki válgabiirriin.
Loga gulaskuddanreivve (PDF, 395 kB)
Masa háliida Sámediggi vástádusa?
Sámediggi dáhttu oaiviliid das makkár dárbbut sámi báikkálaš servodagain ja ovttaskas olbmuin leat dan dáfus mii sáhtášii divvut dáruiduhttima váikkuhusaid. Lea maid deaŧalaš čuvget maid báikkálaš sámi aktevrrat ieža sáhttet dahkat, movt gielddat, Norgga ásahusat ja organisašuvnnat sáhttet searvat bargui, ja makkár doaibmabijuid Sámediggi berre ordnet. Dasa lassin dáhttut mii gullat lea go dárbu rievdadit dahje nannet Sámedikki doarjjaortnegiid.
Álbmotčoahkkimat
Seammás go čađahit čálalaš gulaskuddama, de dollojuvvojit njeallje álbmotčoahkkima válgabiirres.
- Deanus: Mánnodaga njukčamánu 23. beaivvi dii. 18.00-20.00, Galleri Martin, Rådhusveien 32, 9845 Tana Bru
- Gilevuonas: Maŋŋebárgga njukčamánu 24. beaivvi dii. 18.00-20.00, Gilevuona álbmotgirjerádjosis, Strandveien 152, 9790 Kjøllefjord
- Čáhcesullos: Gaskavahku njukčamánu 25. beaivvi dii. 18.00-20.00, Čáhcesullo girjerádjosis, Strandgt. 21, 9800 Vadsø
- Girkonjárggas: Duorastaga njukčamánu 26. beaivvi dii. 18.00-20.00, Thon Hotel Kirkenes, Johan Knudtzens gate 11, 9900 Kirkenes
Dieđut báikki ja geavatlaš áššiid birra almmuhuvvojit Sámedikki neahttasiiddu kaleandaris ja min sosiála mediain go áigi lahkona. Diibmomearit sáhttet rievdat – čuovo fal mielde min kanálain, gos gávnnat varraseamos dieđuid.
Álbmotčoahkkimat leat rabas buohkaide. Doppe dulkojuvvo davvisámegielas dárogillii Interactio bokte. Váldde mielde iežat bealljerusttegiid telefovdnii jus áiggut dulkoma guldalit.
Movt searvat gulaskuddamii?
Buohkat geat háliidit, sáhttet sáddet čálalaš gulaskuddancealkámuša skovi bokte dás vuolábealde.
Gulaskuddanáigemearri lea cuoŋománu 7. beaivvi 2026.
Sádde gulaskuddancealkámuša – deavdde skovi dás
Jus it sáhte geavahit digitála skovi, de sáhtát poastta mielde sáddet iežat cealkámuša.
Sámediggi – Sametinget
Poastaboksa 3
9735 Kárášjohka/Karasjok
Gulaskuddancealkámušat leat almmolaččat almmolašvuođalága mielde ja dat almmuhuvvojit Sámedikki neahttasiidduin.