Dávjá jerron gažaldagat 2017 sámediggeválgga birraDás leat čohkken vástádusaid dávjá jerron gažaldagaide sámediggeválgga 2017 birra. Goas lea válgabeaivi? Sámediggeválgga válgabeaivi lea vuossárgga čakčamánu 11. b. 2017. Muhtun gielddain/suohkaniin lágiduvvo válga maiddái sotnabeaivvi čakčamánu 10. b. Gos sáhttá válgabeaivvi jienastit? Válgabeaivvi fertet dan gielddas/suohkanis jienastit gos don leat čálihuvvon Sámedikki jienastuslohkui. Don lea čálihuvvon jienastuslohkui dan gielddas/suohkanis mas dus lei álbmotregistrerejuvvon ássančujuhus geassemánu 30. b. 2017. Gii sáhttá jienastit jagi 2017 sámediggeválggas? Buohkat geat leat čálihuvvon Sámedikki jienastuslohkui ovdal geassemánu 30. b. 2017, sáhttet jienastit dán jagi válggas. Gii ferte jienastit ovdalgihtii? Don fertet jienastit ovdalgihtii jus du gielddas/suohkanis leat uhcit go 30 olbmo čálihuvvon Sámedikki jienastuslohkui. Jus dat guoská du gildii/suohkanii, de dieđihuvvo dan birra dan válgakoarttas maid don oaččut. Sáhtát maiddái váldit oktavuođa iežas gielddain/suohkanii njuolgga ja iskat dan. Goas sáhttá jienastit ovdalgihtii? Dábálaš ovdalgihtiijienasteapmi bistá borgemánu 10. b. rájes gitta čakčamánu 8. b. rádjai. Olgoriikkas dáhpáhuvvá ovdalgihtiijienasteapmi čakčamánu 1. beaivvi rádjai. Gos sáhttá jienastit ovdalgihtii? Sáhtát jienastit ovdalgihtii vaikke guđe gielddas/suohkanis Norggas. Danne sáhtát jienastit eará gielddas/suohkanis go dan gielddas/suohkanis gos don orut ja leat čálihuvvon jienastuslohkui. Sáhtát maid váldit oktavuođa iežat lagamus gielddain/suohkaniin gullat gos ja goas don sáhtát jienastit ovddalgihtii. Mii galgá mus leat fárus go áiggun jienastit? Dus galgá leat fárus gustovaš legitimašuvdna duođaštus (ovdamearkka dihtii pássa, vuodjinkoarta, báŋkokoarta govain). Dus ii dárbbaš leat válgakoarta fárus. Muhto mii rávvet dattetge váldit fárrui válgakoartta. Válgakoarta álkida válgadoaimmahasaid barggu ja don seasttát ieš áiggi. Manne in leat ožžon válgakoartta? Buot jienasteaddjit ožžot válgakoartta poasttas dan álbmotregistrerejuvvon ássančujuhussii mii sis lei geassemánu 30. b. Jus it leat ožžon válgakoartta, de dat sáhttá leat láhppon poasttas, dahje don lea dieđihan fárrema maŋŋá geassemánu 30. beaivvi. Jus dárbbašat ođđa válgakoartta, de mii sáhttit čálihit dutnje ođđa válgakoartta ja dan sáddet poastta mielde. Váldde oktavuođa minguin e-poastta bokte, mii dárbbašit maiddái olles nama ja dan čujuhusa, gosa don háliidat válgakoartta sáddejuvvot. Sáhtán go jienastit ođđasis válgabeaivvi jus lean jienastan ovdalgihtii? Jus leat jienastan ovdalgihtii, de it sáhte jienastit válgabeaivvi. It ge sáhte máŋgii jienastit ovdalgihtii.