Sámediggeválggat dollojuvvojit seamma beaivvi go stuoradiggeválggat. 2025:s lea válgabeaivi mánnodaga čakčamánu 8. beaivvi. Du suohkana suohkanstivra sáhttá mearridit lágidit válggaid maiddái sotnabeaivvi čakčamánu 7. beaivvi 2025. Dán fertet gulaskuddat iežat suohkanis. Jus leat čálihuvvon jienastuslohkui suohkanis gos leat unnit go 30 olbmo čálihuvvon Sámedikki jienastuslohkui de sáhtát dušše ovdagihtii jienastit.

Oversikt over kommuner med under 30 i manntallet (DOCX, 28 kB)

Sámediggeválggaid bellodatprográmmaid gávnnat daid iešguđet bellodagaid neahttasiidduin dahje jus válddát njuolga oktavuođa bellodagaid/listtuid njunnošiiguin. 

Sáhtát iskat leatgo válgajienastuslogus jus geahčat jienastuslogu maid du suohkan/gielda lea bidjan geahčadeapmái. Jus it gávnna iežat doppe, de sáhtát váldit oktavuođa Sámedikkiin e-boastta dahje telefovnna bokte iskan dihte dán. 

Deike bidjat buot Sámediggeválgga 2025 dohkkehuvvon válgalisttuid go dat leat gárvá.

Sámediggi lea sáddet jienastangoarttaid jienasteddjiide geat leat Sámedikki válgajienastuslogus. Dát leat sáddejuvvon reiveboastta bokte. 

Jus it leat ožžon jienastangoartta, de it dárbbat goitge ballat. Don beasat jienastit dán haga, válgabargit du válgabáikkis ohcet du jienastuslogus ja čálihit dutnje jienastangoartta. 

Don sáhtát ovdalgihtii jienastit sámediggeválggaide buot válgabáikkiin Norggas. Válgabeaivvi sáhtát jienastit dušše iežat suohkanis/gielddas, jus doppe leat eanet go 30 olbmo válgajienastuslogus. Dán sáhtát iskat iežat jienastangoarttas dahje jus válddát oktavuođa iežat suohkaniin/gielddain.

Sámediggeválggain ii leat vejolaš sihkkut namat listtain, muhto don sáhtát ođđasit vuoruhit daid bajemus evttohasaid válgalisttain.