Sámediggeválggaid dáfus lea nu ahte galggat leat deavdán 18 jagi válgajagis.

Jus galggat sáhttit jienastit, de fertet maiddái leat čálihuvvon Sámedikki jienastuslohkui. Go dieđihat iežat dasa, de fertet julggaštit ahte anát iežat sápmelažžan ja ahte juogo dus alddát lea sámegiella ruovttugiellan dahje ahte du váhnemiin, áhkuin/ádjáin dahje máttarváhnemiin lea leamaš sámegiella ruovttugiellan, dahje ahte leat olbmo mánná gii lea dahje lea leamaš jienastuslogus.  

Jus leat čálihan iežat Sámedikki jienastuslohkui ovdal gaskaija geassemánu 30. beaivvi válgajagis, de lea dus jienastanvuoigatvuohta 2025 válggain.

Jus don leat Ruoŧa, Suoma dahje Ruošša beale sápmelaš, de fertet leamaš čálihuvvon Norgga álbmotregistarii maŋemus golbma jagi ovdal go beasat čálihit iežat Sámedikki jienastuslohkui.