Juohkehaš guhte julggašta ahte atná iežas sápmelažžan, ja geas juogo

a)  lea sámegiella ruovttugiellan, dahje
b)  leat dahje leat leamaš váhnemat, áhkut/ádját dahje máttarváhnemat geain lea/lei sámegiella ruovttugiellan, dahje
c) lea olbmo mánná gii lea / lea leamaš jienastuslogus, sáhttet gáibidit čálihuvvot jienastuslohkui.

Buot sápmelaččain Norggas, geat leat badjel 18 jagi dahje devdet 18 jagi válgajagi, lea vuoigatvuohta čálihit iežaset jienastuslohkui. Eará davviriikkaid stáhtaborgárat geat leat sápmelaččat, sáhttet čálihit iežaset jienastuslohkui jus sii válgajagi geassemánu 30. beaivvi muttus leat dieđihan álbmotregistarii ahte ásset Norggas.

Sápmelaččat geat eai leat davviriikkain eret, sáhttet čálihit iežaset válgajienastuslohkui jus sii álbmotregistara dieđuid mielde leat ássan Norggas golbma maŋemus jagi ovdal válgabeaivvi.

Čáliheapmi Sámedikki jienastuslohkui dáhpáhuvvá guovddáš dásis álbmotregistaris, ja jus dieđihat fárrema álbmotregistarii, de čáliheapmi čuovvu fárrema. Jus it dieđit fárrema álbmotregistarii, de gusto liikká dušše ássanbáiki mii lea álbmotregistaris.

Dieđiheapmi interneahta bokte

Jus áiggut čálihit iežat jienastuslohkui interneahta bokte, de fertet logget sisa ID-portálain/MinID:in. Go áiggut čálihit, de soaittát bivdojuvvot ráhkadit alccet geavaheaddjinama ja beassansáni almmolaš ID-portálas. Go dan dagat, de beasat Sámedikki ruovttusiiddu digitála skoviide. 

Sámedikki atná álbmotregistrerejuvvon čujuhusa jienastuslogus. Dan dahká go válgajienastuslohku addá jienastanvuoigatvuođa, ja dus lea jienastanvuoigatvuohta dan suohkanis gos álbmotregistara dieđuid mielde orut.

Jus čujuhus váilu, de deavddát ieš iežat álbmotregistrerejuvvon čujuhusa iežat profiilii. Deaddil «rediger profil» badjin olgeš bealde, ja dohko čálát iežat čujuhusa. Jus dat ii doaimma, de deaddil «slett bruker» go leat «rediger profil» vuolde, de automáhtalaččat loggejuvvot eret. Go de fas logget sisa, de fertet deavdit buot dieđuid ođđasit.

Dieđiheapmi Sámedikki válgajienastuslohkui

Dieđiheapmi báberskovi bokte

Viečča pdf-skovi vuolábealde, deavdde dan ja sádde devdojuvvon ja vuolláičállojuvvon skovi Sámediggái.

Dieđihanskovvi davvisámegiella-dárogiella (PDF, 204 kB)

Ná meannuda Sámediggi dieđihemiid Sámedikki jienastuslohkui 

Sámedikki hálddahus dat meannuda ohcamiid čálihuvvot Sámedikki jienastuslohkui, ja dat meannuduvvojit hálddašanlága eaŋkilmearrádusaid njuolggadusaid vuođul.

Buoremus vejolaš áššemeannudeami dihte ávžžuha Sámediggi juohkehačča gii sádde julggaštusa, bidjat mielde doarvái dieđuid ja vejolaš duođaštusa dasa ahte deavdá eavttuid. Jus dieđut leat váilevaččat, de Sámediggi sádde reivve ja bivdá eanet dieđuid.

Sáhtát ohcat dieđuid sámegiela birra ruovttugiellan álbmotregistaris, girkogirjjiin, sohkagirjjiin dahje giligirjjiin. Sáhttá maid ohcat dieđuid digitála vuorkkáin mat gávdnojit interneahtas.

Dás sáhtát ohcat Digitála arkiivvas

Dás sáhtát ohcat olmmošlohkamiin jagiin 1865, 1875 ja 1900 - 1910 - Historjjálaš dieđuid registrerenguovddáš

Jus dus leat sámi máttut eará riikkain go Norggas, de sáhtát váldit oktavuođa daid riikkaid stáhtaarkiivvain.

Sámediggi dárkkista dieđuid, ja oaččut reivve jus gáibádus dohkkehuvvo. Sámediggi rehkenastá ahte áššemeannudanáigi lea sullii golbma mánu.

Áigemearri dieđihit

Jus áiggut jienastit sámediggeválggain, de lea dieđihanáigemearri geassemánu 30. beaivvi válgajagi. Dán áigemearrái ferte Sámediggi ožžon du dieđiheapmi, danne fertet buori áiggis sáddet dieđiheami.

Dieđihit iežat eret Sámedikki válgajienastuslogus

Jus áiggut dieđihit iežat eret Sámedikki válgajienastuslogus, de deavddát dán skovi: 

Eretdieđiheapmi Sámedikki válgajienastuslogus

Váidit biehttaleami

Jus du ohcamuš čálihuvvot Sámedikki jienastuslohkui ii dohkkehuvvo, de sáhtát váidit biehttaleami. Váidaga sáddet skovi bokte 3 vahku sisa.

Váidin go ohcan válgajienastuslohkui lea biehttaluvvon

Dahje sáddet poastta bokte dán poastačujuhussii: 

Sámediggi - Sametinget 
Poastaboksa 3 
9735 Kárášjohka

Jus dárbbašat veahki 

Jus dus leat gažaldagat dahje dárbbašat veahki, de sáhtát váldit oktavuođa Sámedikkiin juogo telefovnna bokte 78 47 40 00 dahje e-poastta bokte: samediggi@samediggi.no

Persovdnasuodjaleapmi

Jus áiggut dieđuid du vuoigatvuođaid birra go Sámediggi gieđahallá du persovdnadieđuid, geahča Sámedikki persovdnasuodjalanjulggaštusas. Dáppe gávnnat ovdamearkka dihtii dieđuid iežat persovdnadieđuid geahčadeami, divvuma, sihkkuma ja lohkkadeami birra, ja Sámedikki persovdnasuodjalusáittardeaddji gulahallandieđuid.

Ale sádde sensitiiva dahje čiegus dieđuid e-poastta bokte.

Loga Sámedikki persovdnasuodjalanjulggaštusa