Árktalaš ráđđi

Árktalaš ráđđi

Árktalaš Ráđđi galgá ovddidit ovttasbarggu ja oktiiordnema gaskal árktalaš riikkaid dakkár áššiin mat gullet árktalaš guovlluide. Álgoálbmogiid olles searvadahttin ja oassálastin árktalaš ovttasbargui lea guovddášášši.

Sámediggi lea Norgga sáttagottis Árktalaš ráđis ja searvá SAO-čoahkkimiidda ja ministtarčoahkkimiidda. Lea ásahuvvon bargovuohki mas Sámediggepresideanta doallá oasi Norgga sáhkavuorus ministtarčoahkkimiin Árktalaš ráđis. Árktalaš ráđi čállingoddi gávdno Fram-guovddážis Romssas. 

Álgoálbmogiid erenoamáš máhtuid dohkkeheapmi ja dáid máhtuid bisuheami dehálašvuohta go galgá áddet árktalaš servodagaid, leat guovddážis ministtarjulggaštusas Árktalaš Ráđi ásaheami birra. Álgoálbmogiid olles searvadahttin ja oassálastin árktalaš ovttasbargui lea guovddášášši.  

Árktalaš Ráđđi ásahuvvui 1996:s, ja lea áidna regionála ovttasbargoorgána mas buot gávcci árktalaš riikka leat mielde; vihtta davviriikka, USA, Kánada ja Ruošša. Árktalaš Ráđi erenoamáš dovdomearka lea ahte buot davviguovllu álgoálbmotorganisašuvnnat sáhttet oažžut stáhtusa bistevaš oassálastin. Bistevaš oassálastit besset searvat buot čoahkkimiidda ja doaimmaide mat lágiduvvojit Árktalaš Ráđi olis. Guđa álgoálbmotorganisašuvnnas lea dál dakkár stáhtus. Dát leat:

  • Arctic Athabaskan Council (AAC)
  • Aleut International Association (AIA)
  • Gwich'in Council International (GGI)
  • Inuit Circumpolar Council (ICC)
  • Russian Association of Indigenous Peoples of the North (RAIPON)
  • Sámiráđđi/Saami Council (SC)

Árktalaš Ráđis leat vihtta prográmma, maid juohke prográmma bargojuogus hálddaša. Dát leat:

  • Árktalaš birasgáhttenprográmma (AMAP)
  • Prográmma seailluhit árktalaš fauna ja flora (CAFF)
  • Gearggusvuođaprográmma daid olggosluoitimiid várás maid lihkohisvuođat dagahit (EPPR)
  • Mariidna birrasa suodjalanprográmma (PAME)
  • Ceavzilis ovdáneami prográmma (SDP)

Loga eanet Arktalaš ráđi birra