Ráđđehusa eurohpápolitihkalaš forum

Eurohpápolitihkalaš forum lea deaivvadanbáiki guovddáš, regionála ja báikkálaš eiseválddiide ja Sámediggái gulahallamii ja diehtolonohallamii EØS ja EU birra. Gulahallama bokte eurohpápolitihkalaš áššiin ja čuolmmaid galgá forum váikkuhit koordineremii guovddáš, regionála ja báikkálaš dásiid gaskkas.

Forum lea deaivvadanbáiki dáid gaskkas: departemeanttaid politihkalaš dásis (stáhtačállidásis), fylkkagielddaid álbmotválljejuvvon áirasiid (fylkkasátnejođiheaddji/-ráđijođiheddjiid riikkaoasseovttasbarggu bokte), gielddaid (KS váldostivrra bokte) ja Sámedikki. Sámediggi nammada guokte áirasa, oktan várreáirasiiguin.

Forum deaivvada guovtte geardde jagis, ja dan jođihit Olgoriikkadepartemeanta ja Gielda- ja ođasmahttindepartemeanta ovttas stáhtačállidásis.

Ulbmil 

  • Forum galgá leat arena politihkalaš gulahallamii áigeguovdilis ja relevánta eurohpápolitihkalaš áššiin hálddašandásiid gaskkas. 
  • Forum galgá leat kanála sajáiduhttit ráđđehusa eurohpápolitihka gieldasuorggis ja Sámedikkis.  
  • Forum galgá leat kanála cealkámušaide ráđđehussii dehálaš eurohpápolitihkalaš surggiin gieldasuorggi ja Sámedikki bealis.  
  • Forum galgá maid leat arena diehtolonohallamii válljejuvvon áššiin.  

Loga eanet Ráđđehusa eurohpápolitihkalaš foruma birra

Sámediggeráđđi lea nammadan dáid áirasiid ráđđehusa eurohpápolitihkalaš forumii áigodahkii 2021-2025:

Kristin Sara, NSR sámediggeáirras. Persovnnalaš várrelahttu: Helén Storelv-Rabone, NSR sámediggeáirras.

Ulf Tore Johansen, Nordkalottfolket sámediggeáirras. Persovnnalaš várrelahttu: Sylvi Pedersen Vatne, Nordkalottfolket sámediggeáirras.

Almmuhuvvon 15.12.2021 09.06
Maŋemusat rievdaduvvon 06.01.2023 13.24