Muhtun njuolggadusat ja direktiivvat leat vuolgán EU-vuogádagas. Ortnegat ja direktiivvat biebmooadjebasvuođa, šibitdoavtterpolitihka, fievrridanpolitihka, energiijapolitihka ja biraspolitihka birra váikkuhit sámi beroštumiide iešguđege láhkai.  

Sámepolitihkalaš váikkuhanfápmu eurohpa oktavuođas eaktuda ahte mii sáhttit formuleret, oainnusmahttit ja kommuniseret politihkalaš mihttomeriid, gáibádusaid ja vuordámušaid mat fas buvttihit institušonaliserejuvvon ortnegiid váikkuhanfámu ektui.  

Váikkuhanbargu, dahje feaskárastinbargu, lea deaŧalaš oassi EU-vuogádaga politihkalaš eallimis, ja dohkkehuvvo sihke dárbbašlažžan ja sávahahttin EU-ásahusaid beales. Váikkuhanbarggus lea sáhka árjjalaš searvamis EU mearrádusproseassaide. EU mearrádusain sáhttet šaddat váikkuhusat sámiide, ja danne lea deaŧalaš ovdánahttit iežas posišuvnnas EU-vuogádaga ektui.  
 
Sámediggi áigu láhčit dili nu ahte Sámi Parlamentáralaš Ráđđi sáhttá guorahallat movt sámedikkit sáhttet váikkuhit EU mearrádusproseassaide. Sávahahtti lea oažžut rámmaid málliide mat buvttihivčče institušonaliserejuvvon ortnegiid sámi váikkuhanfámu várás EU:s. Lunddolaš lea ahte Suoma ja Ruoŧa beale sámedikkit jođihit dákkár barggu go dat sáhttet viežžat vásihusaid Suoma ja Ruoŧa EU-lahttovuođas.  

Sámediggi searvá Eurohpapolitihkalaš forumii, mas leat čoahkkimat guktii jagis. Forum lea deaivvadanbáiki departemeanttaid, fylkagielddaid, gielddaid ja Sámedikki várás. Ráđđehus lea ráhkadan strategiija EU-ovttasbarggu várás mas dovddahuvvo beroštupmi lávga ovttasbargat EU:in ja árjjalaččat searvat politihkalaš proseassaide Eurohpás. Váikkuhan dihtii deaŧalaš mearrádusaide ferte Norga árrat ja garrasit searvat eupohpapolitihkalaš áššiide. Sámediggi áigu nannet gulahallama ja ovttasbarggu Norgga eiseválddiiguin EU-áššiin.