Ovttasbargu Walt Disney Animation Studios Geassit 2019 almmuhii Sámediggi ahte Norgga, Suoma ja Ruoŧa beale sámedikkit ovttas Sámiráđiin leat ovttas bargamin máilmmi stuorámus mediaservviin, mii lea Walt Disney Animation Studios. Ovttasbarggu oassin geatnegahttojuvvui Disney Animation ráhkadit davvisámegielat veršuvnna stuorrafilmmas Jikŋon 2. Juovlamánus sáhtte mánát miehtá Sámi geahččat kinos Jikŋon 2 mas lei davvisámegielat jietna. Sámi Parlamentáralaš Ráđi presideantagoddi lea ovttasbargguin Sámiráđiin konkretiseren barggu SPR dievasčoahkkimis ahte šiehttat ovttas bargat Walt Disney konsearnain sámi kultuvrrain ávkkástallamis sin márkanfievrrideamis. Ovttasbargu aktevrraid gaskka sohppojuvvui ja suoidnemánus 2019 dieđihedje sámedikkit ja Sámiráđđi ahte Jikŋon 2 filmmas ráhkaduvvo davvisámegielat veršuvdna, mii lea ovttasbarggu boađus Sámi ja Walt Disney Animation Studios gaskka. Sámedikkiide ja Sámiráđđái lea leamaš deaŧalaš sihkkarastit ahte sámi kultuvra mii lea leamaš inspirašuvdnan filbmadahkkiide Jikŋon 2 filmmas, meannuduvvo árvvus atnimiin ja dohkkejumiin. Danne čohkkejuvvui sámi áššedovdijoavku veahkehit filbmadahkkiid ohcat dieđuid sámi kultuvrra, historjjá, vuoigatvuođaid ja servodateallima birra dađistaga filbmaproseassas. Sámi bargojoavkku namman šattai “Verddet”. Verddet-joavkkus ledje mielde Karen Anne Buljo, Veli-Pekka Lehtola, Cecilia Persson, Piia Nuorgam, Christina Hætta ja Anne Lajla Utsi. Loga šiehtadusa Walt Disney Animation Studios (eaŋgalasgillii): Agreement between Walt Disney Animation Studios and the Sámi people (PDF, 8 MB) Loga maiddái: Samarbeid med Walt Disney Animation Studios gir ringvirkninger til Sápmi