– Mii leat álbmot rastá riikarájáid, muhto beaivválaččat bargat mii hárve oppasámi perspektiivvas nu čielgasit go mii leat bargan dán oktavuođas. Gelddolaš lea leamaš dohppet hástalussii min oktasaš opmodatrievtti ektui oppasámi geahčastagas, dadjet sámediggepresideanttat Tiina Sanila-Aikio (Suopma), Aili Keskitalo (Norga), Per-Olof Nutti (Ruoŧŧa) ja Sámiráđi presideanta Åsa Larsson-Blind.
Árvvus atnin ja dohkkejupmi
Suoidnemánus 2019 dieđihedje sámedikkit ja Sámiráđđi ahte ráhkaduvvo davvisámegielat veršuvdna Jikŋon 2 filmmas, mii lei ovttasbarggu boađus Sámi ja Walt Disney Animation Studios gaskka. Sámedikkiide ja Sámiráđđái lei deaŧalaš sihkkarastit ahte sámi kultuvra mii lea leamaš inspirašuvdnan Jikŋon 2 filbmadahkkiide, meannuduvvo árvvusatnimiin ja dohkkejumiin. Danne biddjojuvvui sierra sámi áššedovdijoasku veahkehit filbmadahkkiid ohcat dieđuid sámi kultuvrra, historjjá, vuoigatvuođait ja servodateallima birra filbmaproseassa áigge. Sámi bargojoavkku namman šattai “Verddet”.
– Mii leat rámis min “Verddet” joavkku ektui, mii lea veahkehan fágamáhtuin ja sin áidnalunddot vásihusaiguin dán barggus, dadjet sámi presideanttat.
Verddet-joavkkus ledje mielde Karen Anne Buljo, Veli-Pekka Lehtola, Cecilia Persson, Piia Nuorgam, Christina Hætta ja Anne Lajla Utsi.
Áidnalunddot vejolašvuođat
Šiehtadusas sámi álbmoga ja Walt Disney Animation Studios gaskka leat maiddái eará positiiva oalgeváikkuhusat sámi servodahkii, earret eará láhččojuvvo fágalaš lonohallan ja gelbbolašvuođa ovddideapmi. Buot dát galgá boahtit ávkin sámi álbmogii.
– Mii leat dán proseassas ferten identifiseret mii lea mávssolaš min servodagas ollislaččat, earret eará atnit mii ahte gelbbolašvuođa buorideami doaibmabijut ja vejolaš ovttasbargovejolašvuođat sámi kulturbargiide leat deaŧalaččat olles Sápmái. Mii illudat beassat juohkit eanet detáljjaid dán birra dađistaga go vejolašvuođat almmuhuvvojit, dadjet presideanttat.
Vuolláičállojuvvon šiehtadus:
Agreement between Walt Disney Animation Studios and the Sámi people (PDF, 8 MB)
Biografi Verddet (PDF, 452 kB)