Dåarjoe evtiedæmman fealadassedorjesistie mij åarjelsaemien kultuvrem våaroeminie åtna

Dåarjoe evtiedæmman fealadassedorjesistie mij åarjelsaemien kultuvrem våaroeminie åtna

Saemiedigkieraerie lea 94 000,- kråvnah dåårjeme åarjelsaemien museumasse jïh kultuvrejarngese Saemien Sijte Snåasesne mij edtja attraksjovnem fealadassese evtiedidh dovne Trööndelagesne jïh nasjonaale.

Gosse orre museumegåetie tseegkesåvva dellie aaj orre nuepieh åadtjoeh daajroem jïh dååjresh buektedh dovne saemien årroejidie, voenges årroejidie, guesside regijovneste jïh nasjonaale jïh gaskenasjonaale turistide.

– Saemien Sijten lea jïjnje daajroe åarjelsaemien kultuvren bïjre, jïh sjollehke dah sijhtieh fealadasseevtiedimmiem sov dajvesne jarngesne utnedh, saemiedigkieraerie Silje Karine Muotka jeahta.

Akte bielie prosjekteste lea ellies paahkh beapmoejgujmie jïh dååjresigujmie sjugniedidh gusnie aaj daajroem buakta åarjelsaemien beapmoen bïjre. Edtja beapmoekonsepth evtiedidh navradahkigujmie åarjelsaemien båatsoste, jeatjah saemien navradahkigujmie jïh dorjesigujmie voenges deallahtæjjijste.

– Jalhts koronapandemije lea fealadasse- jïh gåassoehtimmiesuerkiem giehpiedamme, dellie finkese hijven sisvegem evtiedidh. Saemien Sijte dam sïejhme daajroegeerjehtimmiem åtna mij lea vihkeles gaajhkide mijjese, jïh dan gaavhtan daate akte vihkeles dåarjoe, saemiedigkieraerie jeahta.

Akte dejstie ulmijste prosjektine lea laavenjassh ektiedidh, mejtie Saemien Sijte reeremen tjirrh åtna saemien histovrijistie jïh kultuvreste, dååjresh sjugniedidh mah edtjieh viehkiehtidh daajroem, lissiehtamme goerkesem jïh laavenjostoem kultuvri gaskemsh vedtedh.

 - Goerehtimmieh vuesiehtieh kultuvreturisth jolle maahtoem utnieh jïh guhkiem håallestieh aktene sijjesne. Dan åvteste hijven dagkerh turisth åadtjoeh sijjen daerpiesvoeth illedh. Mijjieh dååjrebe jeenjesh sijhtieh vielie lïeredh saemien kultuvren bïjre, jïh dan åvteste daate barkoe Saemien Sijtesne dan vihkele, Muotka minngemes jeahta.

Jis vielie bïevnesh jallh gihtjehtimmiem sïjhth, gaskesadth Silje Karine Muotka (NSR), tlf. 984 87 576 jallh e-påaste: silje.karine.muotka@samediggi.no