Millijovnh saemien maanagïerteprosjektide

Millijovnh saemien maanagïerteprosjektide

Saemiedigkieraerie lea 4,4 millijovnh joekedamme 27 prosjektide maanagïertine mah eadtjohkelaakan saemien gïelem jïh kultuvrem maanagïertine nænnoestieh jïh evtiedieh.

– Daan jaepien jienebh ohtsemh båateme goh aarebi jaepieh, naakede mij lea joekoen hijven. Dagke lea Saemiedigkien evtiedimmieprosjekten gaavhtan SáMOS, jallh jienebh sijhtieh saemien faalenassem maanagïertine faalehtidh, saemiedigkieraerie Mikkel Eskil Mikkelsen (NSR) jeahta.

Daan jaapetje prioriteeremh dåarjoeöörnegisnie Dåarjoe prosjektide jïh evtiedimmiebarkose maanagïertine leah gïeleevtiedimmieprosjekth, voenges evtiedimmieprosjekth mah saemien aerpievuekien barkoem jarngesne utnieh, tseegkeme orre saemiengïeleldh maanagïertefaalenassijste jïh evtiedimmie pilovtemaanagïertijste mah leah veeljesovveme meatan årrodh maanagïerteprosjektesne SáMOS (Saemien maanah orre ektietjiehtjielinie).

Daan jaapetje vierhtieh vadtasovveme 10 gïeleevtiedimmieprosjektide, 13 voenges evtiedimmieprosjektide mah saemien aerpievuekien barkoem jarngesne utnieh jïh njieljie prosjektide mah leah evtiedimmien bïjre pilovtemaanagïertijste.

Gïehtjh joekede prosjeekth jïh evtiedimmiebarkojde maanajgïertide daan jaepien (PDF, 142 kB)

Gïeleevtiedimmieprosjekth

Mikkel Eskil Mikkelsen Árvu/Sámediggi Dej gaskem mah vierhtieh prioriteeremen sisnjelen gïeleevtiedimmieprosjekth åadtjoeh lea Furua maanagïerte Altesne, mij 125 500 kråvnah åådtje ovmessie råajvarimmide mah edtjieh saemien gïelem jïh kultuvrem eevtjedh. Maanah edtjieh såemies saemien baakoeh jïh aerpievuekien saemien stååkedimmieh lïeredh, jïh meatan årrodh bovtseleekedimmesne jïh gosse miesieh mïerhkesjidh. Akte jeatjah maanagïerte Altesne, Holmen gaertene- jïh eatnememaanagïerte, 55 000 kråvnah åådtje juktie maanaj stååkedimmiem ræjhkoesåbpoe darjodh ïebnigujmie jïh dååjresigujmie mah saemien gïelem jïh kultuvrem eevtjieh.

Gïeleprosjekti sisnjeli Ferista ålkoemaanagïerte Tråantesne 100 000 kråvnah prosjektese saemien gïelekuvsje åådtje, gusnie sijhtieh nuepiem vedtedh saemien maanaj eejhtegidie Tråanten tjïeltesne saemien lïeredh sijjen maanajgujmie ektine. Daate edtja iehkedsbiejjiekuvsjine årrodh eejhtegidie noerhtesaemien, åarjelsaemien jïh julevsaemien gïelesne.  

– Jis jieliejimmie saemien gïeleste Tråantesne edtja lyhkesidh dellie daerpies eejhtegh aaj nuepiem åadtjoeh gïelem lïeredh, Mikkelsen jeahta.

Voenges evtiedimmieprosjekth gusnie saemien aerpievuekien barkoem jarngesne åtna

Prioriteeremen sisnjelen voenges evtiedimmieprosjekth gusnie saemien aerpievuekien barkoe lea jarngesne, Rishaugen maanagïerte Altesne 128 000 kråvnah åådtje  juktie saemien kultuvrem jïh gïeledååjresh nænnoestidh. Dah edtjieh gaskem jeatjah giedtesne mïnnedh jïh meatan årrodh leekedimmesne

Espira maanagïerte Skierdesne 75 000 kråvnah åådtje saemien kultuvrebievniemasse jïh gïeleskreejremasse smaave maanide. Prosjekten ulmie lea hoksedh maanah jïh fuelhkieh åadtjoeh sijjen saemien gïelem jïh kultuvrem evtiedidh.

– Daate maanagïerte ij leah aarebi ohtseme, jïh hijven vuejnedh dah sijhtieh saemien gïele jïh kultuvre edtjieh bieline årrodh maanagïerten aarkebiejjeste, Mikkelsen jeahta.

Orre ohtsemeboelhke jaapan 2022 aalka goevten aalkoelisnie.

– Manne haastam maanagïerth mah saemiengïeleldh faalenassem vedtieh, jïh maanagïerth mah sijhtieh faalenassem vedtedh mij saemien gïele- jïh kultuvremaahtoem saemiengïeleldh maanide eevtjieh, ohtsedh, Mikkelsen jeahta.

Jis gihtjehtimmie jallh gyhtjelassh, gaskesadth saemiedigkieraeriem Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no