Orre prioriteeremh Saemiedigkien dåarjoeöörnegisnie båatsose

Orre prioriteeremh Saemiedigkien dåarjoeöörnegisnie båatsose

Daelie maahta dåarjoem Saemiedigkeste syökedh gaskem jeatjah skåårvemidie, prosjektide mah daajroem fuelhkiebåatsosne nænnoestieh jïh råajvarimmide mah bovtsh vihtiestieh mah leah juvrijste båvvalgamme.

BildeKlikkForStorVersjonSaemiedigkieraerie Silje Karine Muotka (NSR)Saemiedigkie lea prioriteeremidie jïh njoelkedasside båatsoen dåarjoeöörnegasse jarkelamme. Daelie maahta gaskem jeatjah dåarjoem skåårvemidie åadtjodh orresjugniedæmman jïh evtiedæmman båatsosne. Skåårvemh maehtieh vuesiehtimmien gaavhtan årrodh skovterehæhtjoeh jallh jeatjah skåårvemh mejtie båatsosne daarpesje, goh gealhka jïh jeatjah dalhketjh mah eah leah vuajastahkh. Gaajhkesh mah åejviebaalhkam båatsoste utnieh maehtieh daan dåarjoen bïjre syökedh.

– Saemiedigkien gaavhtan vihkele saemien aalkoejielemh jïh almetjh prioriteeredh mah dejnie berkieh. Båatsoen leah evtiedimmienuepieh, jïh mijjieh daejrebe båatsosne gellie noere jïh kreatijve almetjh. Sïjhtebe båatsoeburrieh dåarjoehtidh mah leah innovatijve jïh sijhtieh sijjen jielemem evtiedidh, saemiedigkieraerie Silje Karine Muotka (NSR) jeahta.

Maahta aaj dåarjoen bïjre syökedh råajvarimmide jïh prosjektide mah lissiehtamme vihtiestimmiem vedtieh juvreteehpemijstie, jallh råajvarimmide mah lissiehtamme ïedtjem, barkoem jïh radtjoestimmiem vedtieh lisense- jïh kvotavijremistie juvride.

Aerpievuekien daajroe lea nænnoes båatsosne. Saemiedigkie sæjhta dam nænnoestidh, lissine fuelhkiebåatsoem.

– Aerpievuekien daajroe lea våarome båatsoen maahtosne. Dïhte mijjen aerpie, jïh vihkele dam vaarjelidh. Maahta dåarjoen bïjre syökedh råajvarimmide mah ulmiem utnieh aerpievuekien daajroem lïeredh jallh lïerehtidh, Muotka jeahta.

Maahta aaj dåarjoen bïjre syökedh prosjektide jïh råajvarimmide mah aerpievuekien daajroem fuelhkiebåatsosne nænnoestieh.

– Mov håhkoe lea båatsoe vuajna mijjieh aaj dejtie prioriteerebe mah dejnie barkeminie, mejtie båatsoe lea dej aajnehke barkoe jallh dah fuelhkielïhtseginie båatsosne berkieh, dan åvteste dah aktem vihkeles barkoem saemien seabradahkesne darjoeh, Muotka jeahta.

Båatsoen dåarjoeöörnege ræhpas ohtsememierien åtna.

Jis gyhtjelassh jallh gihtjehtimmie, gaskesadth saemiedigkieraeriem Silje Karine Muotka (NSR), tellefovne: +47 984 87 576, jallh e-påaste: silje.karine.muotka@samediggi.no

Ohtsh dåarjoem