Sámedikki bargosuorgái gullet buot áššit mat Sámedikki mielas erenoamážit gusket sámi álbmogii, ja Sámediggi dahká iešheanalis vuoruhemiid álbmotválljen, politihkalaš orgánan.

Álbmotválljejuvvon parlameantan ii leat Sámediggi ráđđehusa vuollásaš orgána, ja danne ráđđehusas ii leat konstitušuvnnalaš ovddasvástádus Sámedikki doaimmas. Ráđđehusas lea dattetge konstitušuvnnalaš ovddasvástádus daid bušeahttaruđaid geavaheamis mat juolluduvvojit kapihttala 560 bokte, poasta 50. Ovddasvástádus mielddisbuktá ahte gielda- ja guovloministtar, bajit dásis, galgá bearráigeahččat ahte ruđat geavahuvvojit mearriduvvon ekonomiijanjuolggadusaid mielde ja Stuoradikki juolludusmearrádusa mielde. KDD hálddaša bušeahttaruđaid mat juolluduvvojit Sámediggái, ja galgá sihkkarastit ahte dat geavahuvvojit Stáhta ekonomiijanjuolggadusaid ja Stuorradikki mearrádusaid mielde.

KDD mearrida njuolggadusaid Sámedikki ekonomiijahálddašeapmái. Sámelága § 2-1 regulere ahte Sámediggái sáhttá fápmuduvvot váldi hálddašit juolludusaid mat juolluduvvojit sámi ulbmiliidda stáhtabušeahtas. Sámediggi sáhttá viidáseappot addit láhkaásahusa doarjaga juohkima ja geavaheami birra. Sámedikki ekonomiijahálddašeami njuolggadusaid mielde galgá Sámedikki ekonomiija- ja doaibmastivren čuovvut Finánsadepartemeantta Reglement for økonomistyring i staten (Njuolggadusat ekonomiijastivremii stáhtas), Bestemmelser om økonomistyring i staten (Ekonomiijastivrema mearrádusat Stáhtas) ja Finánsadepartemeantta johtočállosiid. Njuolggadusat reviderejuvvojit ovttasbarggus Sámedikkiin.