Oahppoplánabuvttus Máhttolokten - SámiMáhttolokten – sámi oahppoplánabuvttus lea sierra parallealla oahppoplánabuvttus dan dábalaš Máhttolokten oahppoplánabuktosii, sámi oahpahusa várás. Das leat mearrádusat, láhkaásahusat, movt sámi oahpahus galgá leat. Gos gusto Máhttolokten – sámi oahppoplánabuvttus Buot oahppit sámi skuvllain galget oažžut oahpahusa sámi oahppoplánabuktosa vuođul. Buot vuođđoskuvllat sámegiela hálddašanguovllus (sámi suohkaniin) definerejuvvojit sámi skuvlan. Dat guokte stáda joatkkaskuvlla Sámi joatkkaskuvla ja boazodoalloskuvla Guovdageainnus ja Sámi joatkkaskuvla Kárášjogas leat geatnegahtton addit oahpahusa sámi oahppoplána vuođul. Oahppit olggobealde hálddašanguovllu geat ožžot oahpahusa sámegielas ja sámegillii galget maid oažžut oahpahusa dán vuođul. Gč. oahpahuslága § 6-2, vuosttaš lađđasa ja oahpahuslága láhkaásahusa § 1-1 b) ja 1-1 c). Sámegiella oahppoplánat gustojit sámegiella oahpahussii sihke siskobealde ja olggobealde hálddašanguovllu. Máhttolokten - sámi oahppoplánabuvttus sisttisdoallá: Oppalaš oassi Sámi oahpahusa prinsihpat Sámegiellafága oahppoplánat Sámi parallealla seammaárvosaš oahppoplánat Sámi oahppoplánat Joatkkaoahpahusa prográmmafágain Fágain maidda eai leat ráhkaduvvon sierra sámi parallealla oahppoplánat, gustojit Máhttolokten dábalaš oahppoplánat sámi skuvllaide maid. Gustojeaddji oahppoplánaid gávnnat dáppe