Skábmamánus 2024 lágidii Sámediggi sámi ohppiidforuma nuppi čoahkkima, mii deaivvadanbáikin sámi mánáide ja nuoraide 5. luohkás 10. luohkkái. 

Loga ohppiid cealkámuša Sámi ohppiidforumis skábmamánu 5. b. 2024 (PDF, 330 kB)

Ohppiidforumas leat mielde oahppit iešguđet báikkiin riikkas - Leavnnjas, Troanddimis, Loabágis ja Kárášjogas ja das guorahallet fáttáid mat gusket sidjiide njuolga. Dát ohppiidforum doaibmá 2024 čavčča rájes 2026 geasi rádjai, ja plánejuvvo ahte oahppit deaivvadit njeallje geardde jagis ja eanaš čoahkkimat lágiduvvojit digitálalaččat.   

Min deháleamos jienat – sámi ohppiidforum

Sámedikki áigumuš ohppiidforumain lea nannet sámi mánáid ja nuoraid jiena barggus sihkkarastit buriid bajásšaddaneavttuid ja oadjebas oahppanbirrasiid. Jus galgat ovddidit buriid doaibmabijuid, de lea dárbbašlaš gullat movt sámi mánát ja nuorat ieža vásihit iežaset árgabeaivvi, ja maid sii oaivvildit lea dehálaš vai sis galgá leat buorre ja fátmmasteaddji skuvla- ja astoáigebiras - almmá givssideami, cielaheami ja eará duolbmamiid haga.

– Sámediggeráđđi lea geatnegahttán iežas searvvahit sámi mánáid ja nuoraid min politihka ovddideapmái. Ohppiidforum lea deaŧalaš arena gos mánát ja nuorat besset guldaluvvot ja aktiivvalaččat searvat, dadjá sámediggepresideanta Silje Karine Muotka.

Beaiveálgu-julggaštusas deattuhuvvo dárbu eastadit givssideami ja sihkkarastit ahte mánáid jietna váldojuvvo duođas mearrádusproseassain. Sámediggeráđđi illuda joatkit ohppiidforuma deaŧalaš arenan mánáid mieldeváikkuheapmái ja sávvá ahte dát váikkuha nu ahte šaddá oadjebasabut ja buoret bajásšaddan buot sámi mánáide ja nuoraide.