Ráhkis dáiddárat ja eará berošteaddjit,

Lea earenoamaš beroštahtti munnje odne ávvudit dinguin din ođđa visttis ja searvat dáid doaluide maid dii lehpet nu árjjalaččat ja duostilit lágidan.

Dáiddadállu lea ge dán fargga 10 jagis go sii leat leamaš doaimmas, šaddan čuvges ovdagovvan midjiide buohkaide. Ollu lea dáhpáhuvvan dan rájes go guokte hutkás ja árjjalaš dáiddára čáliiga sáni “Dáiddadállu” ovtta searviehttii.

Fárrolagaid dii lehpet čájehan mán fámolaš ovttastahttin ja ovttasbargu sáhttá leat, ja man ollu dobbelii lea vejolaš joavdat go bargá fárrolagaid. Din dáiddárguoimmit orrot beaivválaččat vuoitimin bálkkašumiid ja oidnojit buot daid stuorámus lávddiin, čájáhuslanjain ja doaluin.

Dáidaga giella sáhttá ge guoskkahit váimmuid ja nu joavdat mealgat dobbelii, gosa politihkkára sánit eai álo olat. Lea gelddolaš ain gullat makkár prošeavttat ja dáiddalaš olahusat dis begget, ja rámidan maid mo dii váldibehtet servvodat ovddasvástádusa iežaidet prošeavttaiguin.

Sávan Dáiddadállui hui ollu lihkku ođđa visti ráhpamiin, ja ávvudan ain boahtteáiggis gullat din olahusaid birra. Sápmi lea rámis din áŋgirušaiguin.

De cealkkan ahte ođđa Dáiddádállu lea rahppon!