Otnáš boazodoallolága guoskevaš áššiid meannudeapmi hálddahusas ja bohtosat diggevuogádagas, leat máŋgii čájehan ahte boazosápmelaččaid árbevierut ja riekteipmárdusat eai vuhtiiváldo. Dát lokte gažaldaga soahpá go dat láhka álbmotrivttiin ja internašunála konvenšuvnnaiguin.

Sámediggi ja Norgga Boazosápmelaččaid Riikasearvi (NBR) leat ásahan sámi almmolaš láhkalávdegotti mii galgá geahčadit dárbbu rievdadit dáláš boazodoallolága. Lávdegoddi galgá erenoamážit árvvoštallat mo boazodoalloláhka soahpá álbmotrivttiin, čielggadit erohusa priváhtarievttálaš stivrejumis ja almmolaš rievttálaš hálddašeamis, ja evttohit vejolaš rievdadusaid boazodoalloláhkii.

Láhkalávdegoddi lea iešheanalaš lávdegoddi. Lávdegoddi nammaduvvui 29.10.18 ja galgá buktit iežas čielggadeami guovtti jagi siskkobealde. Čállingoddi lea biddjon Sámediggái.

Lávdegoddái sáhttá sáddet cealkámušaid e-poastta bokte: bdlahkalavdegoddi@samediggi.no

Lávdegotti mandáhtta lea:

«Lávdegotti váldobargun lea čielggadit 2007 boazodoallolágas rievdadusdárbbu. Lávdegoddi galgá váldit vuođu Boazodoalloláhkalávdegotti árvalussii (NAČ 2001:35) ja raportii Eanamolsunrievtti gelbbolašvuođa birra boazodoalu siskkáldas beliid ektui. Lávdegoddi galgá dasto árvvoštallat ja vejolaččat evttohit eanet rievdadusaid mat sihkkarastet proseassaid mat čatnasit boazodollui ja main lea legitimitehta boazodoalus. 

Lávdegoddi galgá erenoamážit čielggadit mii lea erohus priváhtarievttálaš stivremis ja almmolaš rievttálaš hálddašeamis, ja dasto árvvoštallat siidaosiid sajádaga. Lávdegoddi galgá evttohit rievdadusaid boazodoallolágas nu ahte nanne boazodoalu areálagáhttema. Lávdegoddi galgá maiddái geahčadit láhkamearrádusaid mat čatnasit boazolohkui.”

Boazodoalloláhkalávdegotti rievdaduvvon boazodoalloláhkaárvalus

Boazodoalloláhkalávdegoddi ovdanbuvttii iežas rievdaduvvon boazodoalloláhkaárvalusa Sámedikkis čakčamánu 12. beaivvi 2022. Álbmotrievttálaš suodjaleapmi, nannejuvvon areálagáhtten, priváhtarievttálaš suodjaleami nannen, kultuvra, dásseárvu ja árbemáhttu ja almmolaš hálddašeami rievdadeapmi leat dušše muhtin daid ovdamearkkain masa lávdegoddi lea bidjan fuomášumi.

Lávdegoddái leat nammaduvvon dát olbmot:

• Jođiheaddji: Professor dr. juris Øyvind Ravna
• Lávdegoddelahtut muđui:
  • Professor dr. juris Mattias Åhren
  • Boazodoalli Nils P. Joma
  • Boazodoalli Samuel John N. Anti
  • Post. doc. Ellen Inga Turi
  • Advokáhtta ja boazodoalli Nils Mikkelsen Utsi
  • Boazodoalli Anna Ravna Gaup
  • Boazodoalli Ellen-Sara Sparrok

Oktavuođadieđut:

Boazodoalloláhkalávdegotti oktavuođadieđut (PDF, 617 kB)

Čállingoddi:
Elle Ristin Anti, 78 47 41 42, elle.ristin.anti@samediggi.no
Margrethe Anti, 78 48 42 14, margrethe.anti@samediggi.no
Petter Tretnes Hansen, 78 47 41 12, petter.tretnes.hansen@samediggi.no
Bernhard Vigen, 78 47 41 26, Bernhard.Vigen@samediggi.no