Roan suohkan (mii dál lea oassin Åfjord suohkanis) háliidii reguleret Almenningsværet guovllu, sihkarastin dihte buoret ja eanet ođasmahttojuvvon ja diehttevaš hálddašeami astoáigeviesuin, kulturbirrasis ja luonddus.

Sámediggi dieđihii 11.11.2019 dárbbu arkeologalaš dutkamiidda ovdal sáhtii dohkkehit plána. Dát dahkkui iešguđet dieđuid vuođul. Sulluin gávdnojit máŋggat kulturmuittut main čearddalaš gullevašvuohta ii leat čielggaduvvon. Muhto stáffut ja gullevaš duktásajit leat ovdal guorahallojuvvon ja beaiváduvvon vikingáigái ja árra gaskaáigái. Lea báikkálaš árbevierru ahte dát leat mearrasámi. Seammás gávdnojit čálalaš dieđut sámi ássama birra guovllus 1800- ja 1900-logus.

Mis lea odne hui unnán diehtu mearrasámi ássama birra Trøndelágarittus gaskaáiggis ja ruovdeáiggis. Danne sáhttá dákkár stuorát regulerenplána álkit boahtit vuostálasvuhtii amas luottaiguin dán ássamis. De lea dehálaš ahte oažžu vejolašvuođa káret buot kulturmuittuid. De lea buoret vuođđu gávdnat sámi ássama mearkkaid. 

Go juo ulbmil lei kulturbirrasa áimmahuššan, ja ekonomalaš rámmat ledje dan mutto unnit, de mearriduvvui ahte Sámediggi ja Åfjord suohkan galggaiga juogadit geahčadeami goluid. Sámediggi oaččui maid de vejolašvuođa geahčadeami oktavuođas guorahallat makkár potensiála lea mearrasámi kulturmuittuid kártemii, ja hukset máhtu dán "vajálduvvon" oasis trøndelága sámi historjjás.

Loga geahčadanraportta Almenningsværet/Ansteinsundet, Åfjord suohkan, 2020 geassemánu (PDF, 8 MB)