Guovdásj hásstalus la hiebalasj jæbddadættov gávnnat etihka vuorodime, sáme kultuvralasj árvoj gaskan - ja aj vieledit dárbov ienep diedojt tjoahkkit sáme histåvrå ja sajedime birra. 

Njuolgadusá ma dagáduvvi galggi liehket vuodon Sámedikke ássjegiehtadallamij mij guoskat ulmutjabátsidisájt ja hávddemateriála ma uddni vuorkoduvvi iesjguhtik ásadusájn rijka sisbielen ja ålggorijkan ja boahtte ássjijda ma gulluji sáme ulmutjabátsidisáj háldadibmáj ráfedum sáme hávdijda. Barggo njuolgadusájda galggá låhpaduvvat 2027 gietjen ja galggá dan maŋŋel giehtadaláduvvat Sámedikke ållestjåhkanimes. 

Máhttovuodo

Oassen bargos la Sámedigge gárvedam máhttovuodov mij tjalmos iesjguhtik åsijt tiemás. Dokumænnta máhttá viettjaduvvat dánna: 

• Sáme almatjij bátsidisáj háldadibme (PDF, 2 MB)
• Nuorttasámegiellaj: Sámi olbmobázahusaid hálddašeapmi (PDF, 2 MB)
• Dárogiellaj: Forvaltning av samiske menneskelige levninger (PDF, 2 MB)

Oarjjelsáme jårggålibme la gárves ragátmáno 2026 gassko rájes. 

Diehto- ja ságastallamtjåhkanime

Basádismáno rádjáj sjaddap tjadádit tjåhkanimrájdov ságastallamtjåhkanimijs moatten bájken Sámen – Várjjagis nuorttan gitta Plassjaj oarjján. Tjåhkanimijn sjaddap subtsastit ulmutjijbátsadijsaj birra ja njuolgadusbargo birra. Ságastallamtjåhkanime li ráhpasa gájkajda, ja mij doajvvop jut da gudi båhti tjåhkanimijda juhki sijá árvvalusájt ja vuojnojt, ájádusájt ja máhtudagás tiemá gáktuj. 

Le máhttelis rádjat tjálalasj guláskuddamav Sámediggáj, ja dav máhtá dahkat Sámedikke næhttabielen gitta guovvamáno 1. bæjvváj 2027. 

Sváldas ienep diehtuj ja guláskuddamij: Guláskuddam – Sáme ulmutjabátsidisáj háldadibme