Doarjja galgá geavahuvvot buvttadit 'Guovža mánáidgárddis - govvagirji jienain', mii lea girji mas leat jienat ja govat mánáidgárddi árgabeaivvis davvi-, julev- ja lullisámegillii. Go mánná deaddela gova, de lohká doahpaga. Jietna sáhttá maid doaibmat doarjjan mánáidgárdebargiide geain ii leat sámegielgelbbolašvuohta.

- Dát lea gelddolaš prošeakta, mas mánáid sáhkkivuođa boktet sihke muitalusain, govain ja jienain. Girji lea stuora veahkkin beaivválaš barggus sámegiela oahpahusas mánáidgárddiin, mánát besset gullat jiena, giela ja doahpagiid, muitala sámediggeráđđi Mikkel Eskil Mikkelsen (NSR).

Prošeavttas lea maiddái digitála resursa, mas lea sisdoallu sihke mánáidgárdebargiide ja mánáide mánáidgárddis. Resurssas leat ollu oasit, nugo máidnasat, muitalusat, lávlagat, luođit, hoahkamat, stoahkamat, bustávat ja jietnadagat, ja minstarat ja hámit maidda bargobihtát čatnasit.

- Mun sávan Davvi Girjái lihku bargui, ja illudan dassá go sihke girji ja digitála resursa leat gárvásat, dadjá sámediggeráđđi Mikkelsen.

Sámediggeráđđi juolluda ruđaid prošektii doarjjaortnega Doarjja pedagogalaš ávdnasiid ráhkadeapmái mánáidgárddiide bokte. Ortnega ulbmil lea ahte mánáidgárddiin, mánáidgárdeoahpaheddjiin ja oahpahusásahusain galgá leat buorre vejolašvuohta fidnet pedagogalaš ávdnasiid sámegillii ja main lea sámi sisdoallu.