Prošeavttat mat dál ožžot doarjaga Giellaovddidandoaimmaid doarjjaortnegis, vuoruhit digitála čovdosiid. Mobiilaáppaid sávvet buktit sámegiela bures olámuddui ja ovddidit buori giellaoahppama.

– Gielat ellet go olbmot daid hupmet. Mii vuoruhit dáiguin prošeavttaiguin ođđamállet čovdosiid mat dahket ahte lea sihke álki ja suohtas sámástit beaivválaš eallimis. Šaddá somá oaidnit ovdáneami ja ieš geahččalit giellaáppaid, dadjá sámediggeráđđi Maren Benedicte Nystad Storslett.

Doarjaga leat ožžon:

• NA TECHNOLOGIES AS oažžu 600 000 ruvnno. Bealli das adnojuvvo lullisámegiela “čálalaboratoria” ráhkadeapmái giellaspealus New Amigos. Nubbi bealli ges adnojuvvo vástideaddji čovdosii davvisámegillii. Ulbmil lea geasuhit mánáid ja nuoraid sámástit stoahkama, ovttasdoaibmama ja movttiidahtti oahpahusa bokte.
• SIKKU MEDIA oažžu 600 000 ruvnno doarjaga. Bealli doarjagis adnojuvvo lullisámegiel áppa-sátnegirjji ráhkadeapmái, ja nubbi bealli ges áppaid Sámi synonymat ja Sámi–English dictionary viidáset ovdánahttimii. Ulbmil lea oažžut ođđamállet sámi giellareaidduid olbmuid olámuddui, vai eanebut álkit gávdnet sániid maid dárbbašit – sihke sámegielagat ja olbmot geat háliidit oahppat.
• SALTEN TECH AS oažžu 300 000 ruvnno doarjaga davvisámegiel giellaáppa Mu beaivi ovdánahttimii. Áppa galgá mánáide ja váhnemiidda fállat vejolašvuođa oahppat davvisámegiela beaivválaš bargguid bokte. Ulbmil lea nannet giela nu ahte čatná oahppama beaivválaš eallima lunddolaš dilálašvuođaide.