Sámi mánáidgárddiid ja sámi ossodagaid doarjjaortnega mihttomearri lea ahte sámi mánáidgárddiin ja sámi ossodagain dáža mánáidgárddiin ohppet sámi mánát sámegiela ja sámi kultuvrra ja árbevieruid birra. Doarjja galgá earret eará geavahuvvot doaimmaide mat ovdánahttet ja nannejit sámi árvvuid, giela, kultuvrra ja árbevirolaš máhtu. 

– Giellalávdegotti raporta Váibmogiella (NAČ 2016:18) čujuha dasa ahte sámegielat mánáidgárddit lea dehálaš doaibmabidju seailluhit ja nannet sámegielaid. Danne lea dehálaš doarjut mánáidgárddiid dan barggus ahte addit buori ja oadjebas sámegielat fálaldagaid, dadjá sámediggeráđđi Maren Benedicte Nystad Storslett.

Oktiibuot leat 649 máná geat ožžot mánáidgárdefálaldaga mas sámi árvvut, giella, kultuvra ja árbevirolaš máhttu lea vuođđun. Mánnálohku juohkása ná: 37 máná ožžot lullisámegielat mánáidgárdefálaldaga, 25 máná ožžot julevsámegielat mánáidgárdefálaldaga ja 587 máná ožžot davvisámegielat mánáidgárdefálaldaga.

Doarjja sámi mánáidgárddiide ja sámegielat ossodagaide 2025: