Daid 26 prošeavtta gaskkas mat dieđihuvvojedje ovdal áigemeari cuoŋománus, vállje NVE dál mannat viidáseappot 11 bieggafápmoplánain, dasa lassin rahppo vejolašvuohta ohcat viiddidit Álttá čáhcefápmorusttega.

NVE árvvoštallaneavttuid vuoruhuvvon evttohusaid válljemii eai leat mielde váikkuhusat sámi kultuvrra ja ealáhusdoaimmaheami luondduvuđđui.

– Váikkuhusat sámi kultuvrra ja ealáhusdoaimmaheami luondduvuđđui galggašedje leat mielde vuoruhaneavttuin álggu rájes juo. Dát prošeavttat bohtet guovlluide gos leat viiddis sámi geavaheaddjeberoštumit ja vuoigatvuođat. Dasa lassin čuohcá prošeavttaid viidodat ollu sámi kulturdoaimmaheapmái Finnmárkkus. Mun vuorddán ahte sihke ráđđehus ja NVE buktet čielga strategiija dasa mo ollislaš noađđi sámi vuoigatvuođalaččaide ja min materiála kulturvuđđui galgá gieđahallojuvvot, dadjá Muotka.

NVE ii sáhte hilgut prošeavttaid mat leat dieđáhusmuttus, dušše vuoruhit dahje vuolidit earáid. Gielddain lea baicca vejolašvuohta biehttalit prošeavttaid go gieđahallet guovloregulerenevttohusa. Finnmárkku gielddat leat dán rádjai hilgon muhtin evttohuvvon prošeavttaid, ja gielddaid meannudeami lea NVE bidjan vuođđun iežaset vuoruhemiide. Earret eará leat prošeavttat Stiertná, Davit Sállanis ja Davit Sievjjus vuoruhuvvon vulos. Maiddái Davvi bieggafápmorusttet lea vulos vuoruhuvvon NVE beales, vaikko Davvesiidda gielda ii lean hilgon dan.

– Mun oaivvildan ahte go NVE:s ii leat láhkavuođđu biehttalit prošeavttaid oalát, de mielddisbuktá dat menddo stuorra eahpesihkarvuođa sidjiide geaidda bieggafápmoohcamat gusket. Mun ávžžuhan prošekterejeaddjiid geaid NVE dál ávžžuha geassit ohcamušaideaset, dahkat dan ja nu duddjot ráfi ovddosguvlui. Dat ahte diekkár ohcamat báhcet eahpesihkkaris dillái dagaha ollu balu, liigebargu ja riidduid, fuomášuhttá sámediggeráđđi Maja Kristine Jåma (NSR).

Sámediggeráđđi ávžžuha ráđđehusa farggamusat buktit konkrehta čovdosiid dasa mo sámi bealit galget oažžut vejolašvuođa oassálastit energiijahuksenproseassain.  

– Mun oainnán ahte energiijaeiseválddiin lea hoahppu ovddidit bagadusa gielddaid plánameannudeapmái ja hoahpuhit prošeavttaid. Ráđđehusas galggašii leat seamma hoahppu čoavdit kapasitehtahástalusaid mat sámi vuoigatvuođalaččain leat, dadjá Jåma.

Geahča movt NVE lea vuoruhan prošeavttaid: Oversikt over prosjekter - NVE