Doarjagat leat addojuvvon doarjjaortnegiid Duodjebádji, Investeren- ja ovddidandoaimmat, DBS (dearvvašvuohta, biras ja sihkarvuohta) ja álggahandoarjja, Gelbbolašvuohta, oahpahus ja kurssat, ja Doaibmadoarjja bokte. Doarjja galgá leat mielde nanneme sihke árbevirolaš ja ođđaáigásaš sámi duoji. 

– Min mielas lea duodji sámi kulturárbbi dehálaš guoddi ja gáldu hutkáivuhtii ja ekonomalaš ovdáneapmái. Duojáriid ja fitnodagaid doarjumiin leat mii mielde sihkkarastime ahte máhttu fievrriduvvo buolvvaid mielde, ja mii leat mielde ráhkadeame bargosajiid sámi guovlluin, dadjá sámediggeráđđi Paul Bendikk Jåma (NSR). 

Doarjagat leat juolluduvvon golggotmánus gitta juovlamánnui 2025:s. 

Dát ožžot doarjaga doarjjaortnegiid bokte:

Duodjebádji

• Láhppi Sámiid Searvi: 50 000 ruvdno doallat rabas duodjelanjaid kursadoaimmaide ja earáide geat háliidit atnit duodjelanjaid. 
• Láhppi Sámiid Searvi: 30 200 ruvdno investeret mašiinnaid, bargoneavvuid ja biergasiid gaskkustandoibmii Sáttomohgáttis, Láhpi suohkanis. 
• Stuornjárgga duodjesiida: 50 000 ruvdno divodit boares skuvlla duodjelanja, ja maiddái ođđa čuovggaide ja gákkesmuoraide. 

Investeren- ja ovddidandoaimmat, DBS ja álggahandoarjja:

• Inga Duodji Espenes: 112 500 ruvdno nannet, bisuhit ja leat mielde ealáskahttime dipmaduoji Nuorta-Finnmárkku riddoguovlluin.
• Malin Wilks: 34 750 ruvdno viiddidit duodjelanja buoret mašiinnaiguin buvttadeami ja sámi designa váste lullisámi guovllus.

Gelbbolašvuohta, oahpahus ja kurssat:

• Min árbe - Vår arv, samisk kulturforening, Mátta-Várjjagis: 32 250 ruvdno goarrunkurssaide ja guovllu gákteárbevieruid viidásetfievrrideapmái.

Doaibmadoarjja:

Doaibmadoarjjaortnegis ožžot 21 ohcci doarjaga. Ortnega mihttomearri lea oažžut duojáriid jođihit eanet iežas duddjon árbevirolaš duoji ja nannet ealáhusa guoddevašvuođa.