Sámediggeráđđi lea juolludan 3 648 958 ruvnno 20 mánáidgárdái Čáhcesullo rájes davvin gitta Plassjii lulde. Ruđat galget adnot prošeavttaide ja ovdánahttinbargguide main ulbmil lea loktet mánáid sámi giella- ja kulturfálaldagaid kvalitehta.
– Dát juolludusat leat buorit investeremat sámi giela ja kultuvrra boahtteáigái. Sámediggi háliida min mánáide addit buoremus vejolašvuođaid ovddidit iežaset identitehta ja gullevašvuođa sámi kultuvrii. Lea mearrideaddji ahte mii ráhkadit buriid rámmaid mánáidgárddiid giellaovddideapmái, nu ahte boahttevaš buolvvat sáhttet seailluhit giela ja min rikkis kulturárbevieruid, dadjá sámediggeráđđi Mikkel Eskil Mikkelsen.
Doarjjaortnet lea mánáidgárddiide mat fállet sámegiel bálvalusaid sámi mánáide, dahje mat háliidit ovddidit sámi giella- ja kulturgelbbolašvuođa.
Dán jagi vuoruhuvvojit:
Giellaovdánahttinprošeavttat (earret eará prošeavttat nugo sámástahtte)
Báikkálaš ovddidanprošeavttat mat deattuhit sámi árbevirolaš bargguid.
Ođđa sámegiel mánáidgárdefálaldagaid ásaheapmi
Juolludeamit leat juhkkojuvvon viđa giellaovdánahttinprošektii, 14 báikkálaš ovddidanprošektii mat deattuhit sámi árbevirolaš bargguid ja ovtta ođđa sámegiel mánáidgárdefálaldaga ásaheapmái.
Juolludusat leat ovdamearkka dihte juhkkojuvvon dáidda:
Stubben barnehage, Čáhcesuolu: Lea ožžon 200 000 ruvnno prošektii “Ruđat sámegielat veahkkebargái, oastimii ja fievrrideapmái”. Ulbmil lea ovddidit sámi mánáid giela ja máhtu. Ruđat galget mannat sámegielat resursii mii galgá leat vuođđobargoveaga lassin. Giellaresurssas lea ovddasvástádus gaskkustit sámi giela ja kultuvrra mánáidgárddi sámi jovkui. Mánát galget oahppat sámegiel sániid, lávlagiid ja muitalusaid, ja maiddái oahppat sámi duoji, málesteami ja doaimmaid birra gárddis.
Læringsverkstedet Furua Naturbarnehage AS, Álaheadju: Lea ožžon 243 000 ruvnno prošektii “Eallin lávu siste ja luhtte”. Ulbmil lea ahte mánáidgárdi šattašii čeahpit ovddidit sámi kultuvrra ja giela. Ruđaiguin galget friddja oastit sámegielat resurssaid mánáidgárdái, mat plánejit prošeavtta doaimmaid ja dollet mánáidbottuid gos mánát ohppet sámi giela, musihka, kultuvrra ja árbevirolaš eallinvuogi birra. Mánáidgárdi galgá maiddái iešguđetge tuvrraide gos sámi kultuvra deattuhuvvo sámi perspektiivvas.
Vestbygd barnehage, Lodegak: Lea ožžon 74 959 ruvnno prošektii “Sámegieloahpahus”. Prošeavtta ulbmil lea ahte sámi mánát besset gullat ja háleštit sámegiela iešguđetge doaimmain mánáidgárddis. Ruđaiguin galget máksit bálkká sámegielat resurssaide. Mánát galget oahppat sámegiela stohkosiid, lávlagiid, luođi ja beaivválaš doaimmaid bokte mánáidgárddis.