Sandra Márjá West Árvu/Sametinget

Govat leat govvejuvvon máŋga jagi badjel 1980- ja 90-loguin, ja čuovvu Karen Anna Logje Gaup (riegádan 1938) siiddainis. Kvaal govve Karen Anna áŋgiris, roastilis ja čielga jienain nissonolbmuid saji hárrái boazodoalus – ja dehálaš ovdagovvan sámi nissonolbmuide boahtti buolvvaide.

– Dát prošeakta čalmmustahttá sámi nissonolbmuid geaid birra boazodoalu historjjá oktavuođas leat menddo unnán duođaštan ja oidnosiidahkan. Govat leat dehálaš gáldun sihke máhttu ja áddejumi dáfus man dehálaš nissonolbmo rolla lei – ja ain lea – boazodoalus, dadjá politihkalaš ráđđeaddi Sandra Márjá West.

Prošeavtta mihttu lea vuogádahttit, scannet ja digitálalaččat meannudit oasi govvačoakkáldagas, ovdal go olles vuorká fievrreduvvo Finnmárkku fylkkagirjerádjui, Čáhcesullos.

Prošeakta lea juhkkojuvvon guovtti muddui. Vuosttas muddu, mii dál oažžu doarjaga, sisttisdoallá olles vuorkká vuogádahttin ja álgoscannen ja dasa lassin digitálalaččat meannudit 300 válljejuvvon govaid. Nubbi muddu plánejuvvo 2026as, ja dalle gárvvistuvvojit govat mat leat vel báhcán ja olles vuorkká fievrrideapmi.

– Dát lea buorre ovdamearkan das mo ovttaskasolbmo álgga ja áŋgiruššan sáhttá váikkuhit seailluhit dehálaš sámi historjjá. Govat eai muital dušše siiddaeallima birra, muhto maid vuoimmi, máhtu ja oktavuođa birra mii guoddá boazodoalu ovddasguvlui, dadjá West.

Doarjja juolluduvvo doarjjaortnega Doarjja regionálaovddidanprošeavttaide bokte.