Davvi Girji AS lea ožžon 677 293 ruvnnu Árraoahppan jietnagovvakoarttat nammasaš prošektii, mii lea oahppanbáhkka mas leat 140 koartta ja koartamašiidna. Juohke koarttas lea govva, doaba ja jietna. Go koarttat biddjojit mašiidnii, de čuojahuvvo jietna oktan sániin ja govain.

Grom AS lea ožžon 800 000 ruvnnu Troll i ord - Utvidning 2024 nammasaš prošektii. Troll i ord lea máinnasráidu digitála vuođđovuogádagas. Dat galgá áimmahuššat sámegielat girjáivuođa mánáidgárddiin. Prošeavttain háliidit viiddidit sámi sisdoalu dakko bokte ahte lea bagadallan neahttakurssaid bokte. Sii áigot maid hábmet sámi máinnas-áppa, mas leat máinnastanjienat davvi-, lulli- ja julevsámegillii. Dasa lassin boahtá digitála sisdoallu doahpagiid hárjehallamiin ja doaimmaiguin mat čatnasit sámi eallinvuohkái, dan birra movt mii hálddašit luonddu ja geavahit dan resursan.

Trööndelagen fylhkentjīelte/Trøndelag fylkeskommune lea ožžon 900 000 ruvnnu prošektii "Sansepake - aktiviteter med utgangspunkt i de 8 årstidene", ja oasseprošektii "Tjaktje jïh tjaktjedaelvie". Oahpponeavvus leat teavsttat, jietna, illustrašuvnnat, filbmaoasit ja visualiserenreaiddut. Ráhkaduvvo maid aktivitehtagirji mii gullá prošektii. Dán láhkai mánát besset geavahit iešguđetlágan áiccuid doaimmain.

TV2 Skole lea ožžon 950 000 ruvnnu prošektii man ulbmil lea ovddidit giellamovttiidahtti ávdnasiid mánáidgárddiide. Materiála lea davvi-, lulli- ja julevsámegillii. Prošeakta áigu ráhkadit reaidduid vuđolaš doabaoahppamii. Dát dahkkojuvvo videoid, spealuid, govviduvvon e-girjjiid bokte, mat geasuheaddji ja somás vugiin oahpahit mánáide vuođđodoahpagiid.

– Dát prošeavttat addet deaŧalaš doarjaga sámi giellaoahpahussii ja mun sávan ahte mii oaidnit oalgeváikkuhusaid boahttevaš jagiid, sámegielaid buori nannemiin, dadjá sámediggeráđđi Mikkel Eskil Mikkelsen (NSR).

Doarjagat oktiibuot 3 327 293 ruvnnu ovddas leat addon doarjjaortnegis Doarjja ovdánahttit pedagogalaš ávdnasiid mánáidgárddiide.