Doarjja Internašunála Sámi Filbmainstituhttii (ISFI) addojuvvo nannet sin hálddahusa ja hálddahusa gelbbolašvuođa, vai dat nákcejit hálddašit ja ruhtadit sámi filbmasuorggi našunála dásis.

Duogáš lea ahte Stuoradiggi bivdá mearrádusas 206/2024 ráđđehusa ovttas guoskevaš aktevrraiguin čielggadit Internašunála Sámi Filbmainstituhta (ISFI) našunála mandáhta, dainna ulbmiliin ahte defineret váldoovddasvástádusa sámi filbmasuorggi hálddašeamis ja ruhtadeamis.

Ole-Henrik Bjørkmo Lifjell Ørjan Marakatt Bertelsen

ISFI oaivvilda ahte stuorradiggemearrádus čielgasit signalisere ahte ISFI galgá oažžut seamma rolla sámi filmma ektui go mii Norgga filbmainstituhtas (NFI) dál lea Norgga filbmasuorggi ektui, ja ahte dat mielddisbuktá ahte ISFI:s sáhttá leat stuoridanproseassa vuordimis, masa organisašuvdna ferte ráhkkanišgoahtit.

– ISFI lea olu jagiid leamaš deaŧalaš ásahus sámi filbmii ja sámi filmma ovddideaddji. Dat leat maid váikkuhan dasa ahte sámi filbma lea šaddan dovddusin ja dohkkehuvvon Norggas ja olgoriikkas. Mii leat ilus go sáhttit váikkuhit dasa ahte ISFI galgá sáhttit váldit badjelasas našunála barggu ruhtadit sámi filbmasuorggi, dadjá sámediggeráđđi Ole-Henrik Bjørkmo Lifjell (NSR).

300 000 ruvdnosaš doarjja addojuvvo Sámedikki doarjjaortnegis ásahusovddideapmi. Doarjjaortnega mihttomearri lea sámi kulturásahusat main lea fágalaš ođasmahttin ja ásahuslaš ovdáneapmi, ja doarjjaortnegis lea rabas ohcanáigemearri gitta skábmamánu 3. beaivvi 2025, dii 15.30, rádjai.