Sámediggeráđđi lea doarjjaortnega Giellaovddidandoaimmat bokte juolludan 300 000 ruvnno Norgga Girkui. Norgga Girku lea guovvamánu 16.–19. beivviid lágidan konfirmánttaleairra dán jagi sámi konfirmánttaide. Dán jagi leat ollu sámi konfirmánttat mii lea mielddisbuktán ahte ii lean vejolaš čohkket buot nuoraid seamma sadjái. Norgga Girku lea šaddan juohkit konfirmánttaid guovtti jovkui. Okta joavku deaivvadii Tømmernesetis olggobeale Orjješ-Ráissa ja nubbi joavku Sjunkhattenis Bådåddjo olggobeale.

Sámediggi lea máŋga jagi juolludan doarjaga Sámi konfirmánttaleirii. Ovddit jagiid lea konfirmántaleaira leamaš daid sámi konfirmánttaid várás geain ii leat sámegiella dahje sámi sisdoallu dábálaš konfirmašuvdnaoahpus. 2023 rájes lea dát rievdan nu ahte leaira lea buot sámi konfirmánttaide, beroškeahttá leago sis sámegiella ja sámi sisdoallu dábálaš konfirmašuvdnaoahpus dahje ii. Leairra ulbmil lea čohkket juohke sámegiela guovllu nuoraid. Sis geain lea sámegiella ruovttugiellan besset giellaarena bokte oahppat ođđa doahpagiid, tearpmaid ja sániid, muhto maid gullat ja oahpásnuvvat eará sámegielaide. Sii geat eai máhte sámegiela nu bures besset gullat ja praktiseret sámegiela.

– Sámediggi oaidná dehálažžan ahte nuorat besset čoahkkanit giellaarenaide. Dán giellaarenas besset sihke ovddidit ja maid hárjánit sámástit. Giellaarenas lea maid vejolaš oahpásnuvvat eará sámegielaide. Sámi nuoraide lea maid dehálaš oažžut oskkuoahpahusa iežaset váibmogillii, dadjá sámediggeráđđi Mikkel Eskil Mikkelsen (NSR).