Doarjjaortnega Sámi mátkeealáhusat, hutkkálaš ealáhusat ja sámi borramuš bokte juolluda Sámediggi 435 000 ruvnno doarjjan Visit Kirkenes Region SA:i.

Prošeakta Matnettverk Øst-Finnmark galgá leat mielde nannemin Kirkonjárgga ja Várjjat-guovllu borramuš- ja vuođđoávnnasguovlun, láhčimin dilálašvuođaid vai báikkálaš borramušbuvttadeaddjit šaddet eanet gánnáhahttin ja oidnosiin, ja nannemin máhtu báikkálaš borramušgálvvuid ja borramušárbevieruid birra.

– Dát lea hirbmat dehálaš prošeakta maid doarjut. Mis leat nana borramušárbevierut ja áidnalunddot ávdnasat mat ánssášit vel stuorát oinnolašvuođa ja árvoháhkama. Mii illudat čuovvut ovdáneami viidáseappot, ja oaivvildat ahte prošeakta sáhttá čájehit mo ovttasbargu ja báikkálaš čanastupmi sáhttá addit ođđa vejolašvuođaid sihke ealáhusaide ja báikegoddái, lohká sámediggepresideanta Silje Karine Muotka (NSR).

– Sámediggi áŋgiruššá eamiálbmogiid biebmovuogádagaiguin ja eamiálbmotmáhtuin dehálaš oassin biebmo- ja ealáhusovddidanbarggus. Mis leamaš viiddis beroštupmi fáddái mii min mielas lea dehálaš dearvvašvuhtii, gearggusvuhtii, vuoigatvuođaide ja boahtteáigái, loahpaha sámediggepresideantta.